Innlent

Sigri hrósandi Árni Sam sendir fjölmiðlum tóninn

Jakob Bjarnar skrifar
Árni Sam fagnar sigri Trumps og notar tækifærið og sendir fjölmiðlum og stuðningsfólki Hillary glósur í leiðinni.
Árni Sam fagnar sigri Trumps og notar tækifærið og sendir fjölmiðlum og stuðningsfólki Hillary glósur í leiðinni.
Árni Samúelsson bíókóngur hjá SAM-bíóunum var meðal stuðningsmanna Trumps og fagnar hann sigri Donald Trumps í nýafstöðnum forsetakosningum í Bandaríkjunum innilega á síðu sinni. Árni notar tækifærið og sendir fjölmiðlum og stuðningsfólki Hillary Clinton glósur í leiðinni.

Árni var staddur úti í Bandaríkjunum meðan kosningarnar stóðu yfir, hann var á kvikmyndahátíð í L.A. þegar Vísir falaðist eftir stuttu viðtali við hann í gær. En, hann hefur fagnað sigri Trumps með nokkrum færslum og myndum á Facebooksíðu sinni.

Árni Samúelsson telur vert að setja ofan í við þá sem honum þótti fara offari í kosningunum. Og helst á honum að skilja að niðurstaðan sé makleg.
Í einni þeirra segir: „Trump að verða forseti Bandaríkjanna. Hér eru ruglaðir aðdáendur Hillary,“ skrifar Árni og birtir mynd af miður stuðningsmönnum Hillary Clinton sem eru augljóslega í talsverðu uppnámi.

Árni bætir við: „Vísir.is hver hjá ykkur gengur með veggjum núna“ og er óvíst hvað hann meinar nákvæmlega með þeim orðum en hann er væntanlega að vísa til umfjöllunar Vísis í gær þess efnis að vandkvæðum sé bundið að finna yfirlýsta stuðningsmenn Trumps á Íslandi.

„Og mbl.is hefði nú ekki verið betra að vera hlutlausir í ykkar fréttaflutningi,“ er jafnframt spurning sem Árni slær fram á Facebookvegg sínum, sigri hrósandi.

Guð hjálpi okkur

En, þeir eru ekki margir sem eru á línu Árna þó þá megi finna ef að er gáð. En, sé skautað yfir Facebook ríkir þar heilt yfir verulegt uppnám vegna sigurs Donalds Trumps með fáeinum undantekningum.

Fólki upp til hópa virðist illa brugðið. Hér eru fáein dæmi af fullkomnu handahófi, en þetta má heita til marks um tóninn í mannskapnum almennt:

Tobba tilheyrir miklum meirihluta þeirra sem er illa brugðið: Hvernig í andskotanum gat þetta gerst?vísir/anton
Tobba Marinósdóttir athafnakona segir: „Ég er á leið til Bandaríkjanna í dag. Ég missti allan áhuga eftir kosningarnar í nótt. Hvernig í andskotanum gat þetta gerst!“

Tobbu er ekki skemmt en sumir reyna að krafla sig í gegnum vonbrigðin með háðskum húmor.

Þannig segir Guðlaug Elísabet Ólafsdóttir leikkona: „Er ekki við hæfi að fá sér vodka í morgunmat? Og já, taka aftur upp reykingar.“

Og Felix Bergsson fjölmiðlamaður segir: „Hvað næst? Bobby Ewing kemur úr sturtunni?“

Páll Valsson útgefandi er með böggum hildar: „Frekar fáfróðan rudda og lýðskrumara en hæfustu konuna ...“ og þannig má lengi áfram telja.

Lilja Sigurlína Pálmadóttir athafnakona talar á einkennandi nótum þegar hún segir: „Guð hjálpi okkur“.


Tengdar fréttir

Sigurræða Trump í heild sinni

Donald Trump var sigurreifur er hann hélt sigurræðu sína fyrir stuðningsmenn sína á kosningavöku Trump í New York




Fleiri fréttir

Sjá meira


×