Stóri Ben bað Brady um treyju fyrir leik | Myndband

Stóri Ben Roethlisberger, leikstjórnandi Pittsburgh Steelers í NFL-deildinni í amerískum fótbolta, bað Tom Brady, kollega sinn hjá New England Patriots, um treyju hans fyrir leik liðanna um síðustu helgi.

Roethlisberger gat ekki spilað leikinn vegna meiðsla en Tom Brady átti ekki í miklum vandræðum með að sækja sigur til Pittsburgh. Gestirnir unnu örugglega, 27-16.

„Ég ber svo mikla virðingu fyrir þér. Mig langar svo að vera hérna úti á vellinum og spila,“ sagði Roethlisberger við Brady en samtal þeirra heyrðist vel á myndavélum. „Mér líður eins,“ sagði Brady við Stóra Ben.

„Ég hef aldrei gert þetta áður en ég myndi elska að fá treyju frá þér. Mig vantar eina á skrifstofuna,“ sagði Roethlisberger og það var nú ekki mikið mál. Brady reddaði honum treyju eftir leik.

Þessa hugljúfu stund má sjá í spilaranum hér að neðan.