Búist við mikilli áframhaldandi rigningu á Suður- og Vesturlandi

Miklir vatnavextir eru í ám á Suður- og Vesturlandi samkvæmt tilkynningu frá Almannavarnadeild ríkislögreglustjóra.

Mikið hefur rignt á Suður- og Vesturlandi síðan í gær og hafa veðurspár gengið vel eftir. Mest úrkoma hefur mælst í Bláfjöllum, en þar er sólarhringsúrkoma nú um 150 millimetrar.

Búast má við mikilli rigningu á Vesturlandi fram yfir miðnætti, en á Suðurlandi má búast við mikilli úrkomu allan næsta sólarhring.

Mestu flóðin fyrir vestan

Í tilkynningunni kemur fram að mestu flóðin hingað til hafi verið á Barðaströnd, Snæfellsnesi og á svæðinu við Mýrdalsjökul. „Einnig hafa verið miklir vatnavextir í ám í nágrenni Reykjavíkur og er enn að vaxa í þeim. Enn hafa ekki verið mjög miklir vatnavextir á vatnasviði Hvítár og Ölfusár en rennsli þar á eftir að vaxa allan morgundaginn.“

Þá hefur verið mjög mikið rennsli í Soginu. „Rennsli þar er nú um 220 m³/s og er enn að vaxa. Meðalrennsli í Soginu er um 109 m³/s. Hámarkið þar verður líklega á morgun en spáð er mikilli úrkomu þar í nótt.“

Rennsli í jökulám Sunnanlands sjaldan verið meira

Rennsli Múlakvíslar og Jökulsár á Sólheimasandi hefur líklega sjaldan orðið meira undanfarna áratugi ef frá eru talin jökulhlaup. Í Krossá í Þórsmörk er einnig mjög mikið rennsli og er áin farin að dreifa mikið úr sér.

„Enn á eftir að vaxa mjög í ám á svæðinu frá Mýrdalsjökli til Hornafjarðar. Veðurstofan er með vatnhæðarmæli í Djúpá, rennsli þar er nú komið yfir 100 m³/s og vex hratt. Gera má ráð fyrir að rennsli Djúpár og annarra vatnsfalla í Skaftafellssýslu haldi áfram að vaxa þangað til síðdegis á morgun,“ segir jafnframt í tilkynningu frá Almannavarnadeild ríkislögreglustjóra.