Trúðslæti vekja óhug

Í Bandaríkjunum, Bretlandi og víðar er einhver lenska þessa dagana að klæða sig upp í trúðabúning og hræða fólk. Að minnsta kosti er fólk um allan heim að tilkynna lögreglu og öðrum viðbragðsaðilum um skuggalega trúða og er jafnvel farið að tala um faraldur í þessu samhengi. Fjölmiðlar vestanhafs og annars staðar reyna að greina þetta ástand og flestir rekja þennan „faraldur“ til Suður-Karólínu en lögreglu þar fór að berast ógrynni tilkynninga um skuggalega trúða sem reyndu að lokka börn inn í skóg. Líklegast er að einhver klæddur sem trúður hafi upphaflega reynt að lokka barn eða börn inn í skóglendi og síðan hafi sagan undið upp á sig með hjálp fjölmiðla og ferðast hringinn í kringum jörðina með hjálp internetsins. Það er alveg óhætt að tala um meme hér í þessu samhengi.

Skyndibitakeðjan McDonalds hefur til að mynda brugðist við þessu brjálæði með því að draga úr birtingu á hinu elskaða lukkudýri sínu Ronald McDonald en hann er auðvitað trúður. Maður nokkur í Wisconsin missti forræði yfir fjögurra ára dóttur sinni vegna þess að hann skildi hana iðulega eftir eina heima á meðan hann fór út að hræða fólk klæddur í trúðabúning. Það hefur verið skotið á fólk fyrir að vera trúðslegt í útliti. Sjálfur konungur hryllingsins, Stephen King, er skelkaður yfir öllum trúðafréttunum. Fólk er handtekið ýmist fyrir að klæðast sem trúðar eða fyrir falskar tilkynningar um trúða og fólk sem vinnur sem trúðar og hefur gert lengi fær ekki vinnu á meðan þetta æði gengur yfir. Þvílíkt ástand.

Hvers vegna trúðar?

Trúðar hafa verið til í þúsundir ára; fyrstu heimildir um trúða koma frá Forn-Egyptum og á miðöldum voru hirðfífl trúðar sem litu öðruvísi út og gerðu bjánalega hluti fyrir yfirstéttina til að hlæja að í veislum og við önnur tilefni þar sem hún þurfti að fá á smá staðfestingu á yfirburðum sínum. Í kringum 1800 varð trúðurinn Joseph Grimaldi frægur í Bretlandi en hann fann upp á því að mála sig hvítan í framan ásamt því að sporta stóru, rauðu brosi. Grimaldi var á sama tíma líklega upphaf minnisins um sorgmædda trúðinn en einkalíf hans var fullt af hræðilegum sorgum þó að hann væri alltaf óþægilega glaður þegar hann kom fram með trúðslætin sín.

Þó að trúðar séu þekktastir fyrir að skemmta börnum með því að hrasa, fá tertur í smettið og vera rosalega margir saman í litlum bílum þá eru ekki allir hrifnir af þeim. Það er eitthvað óhugnanlegt við málað andlitið og uppgerðaránægjuna sem ristir djúpt í okkar innsta mannlega eðli, við viljum geta lesið í andlitin á öðrum manneskjum og geta treyst tilfinningum þeirra. Trúðar eru „uncanny“ svo Freud fái smá pláss hérna, en þeir herma eftir mennskum eiginleikum en ná því ekki alveg og verða þar með óhugnanlegir.

Það bætir síðan ekki úr skák að síðan fjöldamorðinginn í trúðsbúningnum, John Wayne Gacy, myrti fólk, hafa trúðar margoft verið notaðir í sjónvarpsþáttum, bíómyndum og öðrum miðlum sem táknmynd hryllings. Það er teljandi á fingrum annarrar handar hversu oft trúður hefur verið „góði kallinn“ í kvikmynd en hins vegar eru illir trúðar orðnir svo ótrúlega margir að plássið hér í þessu blaði dugar engan veginn til að telja þá alla upp.

Nokkrir frægir trúðar (sem kunna að hafa skemmt sálir okkar sumra)

Twisty the Clown

Twisty the Clown er einn illræmd­asti karakterinn úr American Horror Show en hann er mjög afmyndaður og skítugur trúður sem myrðir fólk. Hann er frekar nýtilkominn í flóru hryllilegra trúða og má alveg gefa sér það að vinsældir hans hafi átt sinn þátt í að byrja þetta nýja trúðaæði.

Jókerinn

Jókerinn úr Batman-heiminum er kannski ekki eiginlegur trúður en það er mjög augljóst að hann er byggður á trúðum – þ.e.a.s. hann er byggður á jókerspilinu sem á er mynd af trúð eða hirðfífli.

John Wayne Gacy

Fjöldamorðinginn John Wayne Gacy er einn alræmdasti morðingi síðustu aldar. Hann var kallaður Killer Clown en hann misnotaði og myrti að minnsta kosti 33 unga menn frá 1972 til 1978. Hann kom einnig fram sem trúðurinn Pogo í góðgerðarstarfi.

Pennywise

Trúðurinn úr It. Þakka þér fyrir Stephen King, ég þorði ekki að þvo mér um hendurnar né að nálgast holræsi í mörg ár eftir að hafa séð It.

Killer Klowns from Outer Space

Mjög undarleg B-mynd um geimverur sem ráðast á jörðina en svo vill til að þessar geimverur líta allar út eins og trúðar.