Úr myrkrinu í barnadrama

„Þetta er saga um litla dramadrottningu eins og margir foreldrar kannast kannski við, sú týpa leynist víða. Þetta er stór hluti af bernskunni, að vera svona upptekinn af eigin tilfinningum og líðan þar sem allt snýst um að vera miðja alheimsins,“ segir rithöfundurinn Stefán Máni um barnabókina sem hann sendi nýlega frá sér. 

Bókin ber titilinn Hin æruverðuga og ættgöfuga hefðarprinsessa fröken Lovísa Perlufesti Blómsdóttir – Daprasta litla stúlka í öllum heiminum.

Stefán segir að hugmyndin að sögunni hafi kviknað þegar dóttir hans, Helena Mirra, var lítil skotta.

„Sagan er innblásin af nokkurs konar krakkabulli, til dæmis Blómas­dóttir,  og hluti af nafni bókarinnar kemur einmitt frá Helenu. Þetta er svo heillandi heimur sem börnin búa í, það er að segja þegar þau stækka veruleikann og búa til alls konar persónur,“ segir hann og bætir við að í grunninn sé þetta mjög einföld hugmynd.

Stefán Máni hefur í gegnum tíðina skrifað myrkrar spennubækur en ákvað að breyta til og koma fólki á óvart þar sem hann heldur upp á 20 ára starfsafmæli sitt í ár.

„Ég er alveg á því að ef bókin er ekki spennandi, alveg sama hvort maður er að skrifa ástarsögur, spennubækur eða barnabækur, þá virka þær ekki. Sagan varð til fyrir tólf árum, en ég sá þessa sögu allaf fyrir mér fallega myndskreyta bók. Það var ekki fyrr en ég kynntist Bergrúnu Írisi myndlistakonu að það kviknaði líf í sögunni aftur. Þetta er samstarfsverkefni og hefur gengið virkilega vel.“

Stefán segir það alls ekki útilokað að hann komi til með að skrifa aðra barnabók á næstunni. Það velti allt á viðtökunum við þessari bók.

„Það er nú ekki efst í huga mér núna, en alltaf þegar eitthvað gengur vel þá er það hvati svo við sjáum til“.