Handtóku grunaðan fíkniefnasala á Suðurnesjum

Lögreglan á Suðurnesjum handtók um síðustu helgi grunaðan fíkniefnasala og haldlagði meint fíkniefni og landa á heimili hans, að fenginni leitarheimild.

Þetta kemur fram í tilkynningu frá lögreglu. Við öryggisleit á manninum fannst umtalsverð fjárhæð í reiðufé.

„Þegar umræddur einstaklingur var færður á lögreglustöð kom í ljós við sýnatökur að hann hafði neytt metamfetamíns, MDMA og kannabisefna.  Hann var yfirheyrður með aðstoð túlks og látinn laus að því loknu.

Lögreglan minnir á fíkniefnasímann 800-5005.  Í hann má hringja  til að koma á framfæri upplýsingum um fíkniefnamál. Fíkniefnasíminn er samvinnuverkefni lögreglu og tollyfirvalda og er liður í baráttunni við fíkniefnavandann,“ segir í tilkynningunni.