Kona grunuð um íkveikju játaði að hafa kveikt í bók

Konan sem grunuð er um íkveikju í húsi í Skólagerði í Kópavogi er laus úr haldi. Hæstiréttur felldi úrskurð Héraðsdóms Reykjaness um að henni yrði gert að sæta gæsluvarðhaldi til 8. ágúst. Konan játar að hafa kveikt í bók inn í íbúðinni.

Eldur kviknaði í íbúð á sunnudaginn síðastliðinn og voru þrjár konur handteknar vegna eldsins en þær voru allar í húsinu þegar eldurinn kom upp. Tvær þeirra voru látnar lausar að loknum yfirheyrslum.

Miklar skemmdir urðu á íbúðinni en vel gekk að ráða niðurlögum eldsins. Liggur fyrir að eldur var kveiktur inn í íbúðinni. Í greinargerð lögreglu segir að sterkur grunur sé um að konan beri ábyrgð á þeim verknaði. Vitni í málinu beri að kærða hafi sagt að hún hafi kveikt í og þá hafi hún viðurkennt að hafa kveikt í.

Sjá einnig: Ítrekaðir brunar valda óhug íbúa í Skólagerði

Konan sem grunuð er um að hafa kveikt í íbúðinni býr þar ásamt manni sem ekki var viðstaddur þegar er eldurinn kom upp. Íbúðin er í eigu ömmu mannsins. Að sögn nágranna í götunni var fólk í húsinu þegar kviknaði í, bæði á hæðinni fyrir ofan og í næstu íbúð. Málið veki mikinn óhug enda hefði geta farið illa þó engin slys hafi orðið á fólki í þetta sinn.

Húsið sem um ræðir er parhús og tengt tveimur íbúðum. Í úrskurði héraðsdóms segir að með íkveikjunni hafi falist mikil hætta fyrir fjölda fólks og að konunni hafi mátt vera ljóst að brotið væri þess eðlis að það hefði í för með sér almannahættu, því hafi þótt brýna nauðsyn bera til þess að konunni yrði gert að sæta gæsluvarðhaldi til 8. ágúst.

Hæstiréttur felldi þennan úrskurð úr gildi en í dómi Hæstaréttar segir að þrátt fyrir að háttsemi konunnar hafi falið í sér augljósa og mikla almannahættu þurfi þó meira að koma til þess að hægt sé að úrskurða hana í gæsluvarðhald. Ekki verði ráðið af gögnum málsins að konan hafi áður gerst sek um sams konar háttsemi og að ekki sé sýnt fram á að nauðsyn beri til þess að úrskurða hana í gæsluvarðhald.