Vilja stofna lýðháskóla á Laugarvatni

Ungmennafélag Íslands (UMFÍ) hefur áhuga á að stofna og reka lýðháskóla á Laugarvatni. Horft er til húsnæðis íþróttakennaraháskólans á Laugarvatni.

Áhuginn kviknaði eftir að háskólaráð Háskóla Íslands ákvað fyrr á þessu ári að flytja námið frá Laugarvatni til Reykjavíkur en gangi það eftir fækkar opinberum störfum í Bláskógabyggð.

Í tilkynningu félagsins segir að með stofnun lýðháskóla á Laugarvatni sé spornað við fækkun starfa auk þess sem valmöguleikum námsmanna að loknu stúdentsprófi fjölgi.

Haukur Valtýsson, formaður UMFÍ, segir þörf fyrir þessa tegund skóla fyrir íslensk ungmenni sem hafi lokið stúdentsprófi og velti framtíðinni fyrir sér. Þá bendir hann á að lýðháskólar eigi upp á pallborðið hér á landi sem valkostur nú um stundir, ekki síst ef teknar verði upp meiri fjöldatakmarkanir í íslenskum háskólum eins og á Norðurlöndunum.

„Ef það verður að veruleika er lýðháskóli góður kostur fyrir þá sem vilja læra eitthvað annað en boðið er upp á í háskóla og vilja einnig fá tíma til að átta sig á hvað viðkomandi vill læra í háskóla. Margir innan og utan UMFÍ hafa farið í erlenda lýðháskóla og segjast búa að því í lífinu,“ segir Haukur.