Fjölmargar ólíkar útihátíðir í ár

Verslunarmannahelgin er framundan og búa landsmenn sig undir stærstu ferðahelgi ársins. Þó nokkrir tóku helgina snemma og lögðu af stað úr bænum í dag.

Fjölmargar ólíkar útihátiðir eru skipulagðar nú um verslunarmannahelgina og miðað að við hvernig verðurspáin er má búast mikilli umferð á þjóðvegum landsins.

Á vesturlandi verður boðið um á Sæludaga í Vatnaskógi á vegum KFUM og KFUK og í Borgarnesi verður Unglingalandsmót UMFÍ haldið í 19. skipti. Vestur á Ísafirði verður evrópumótið í Mýrarbolta og Síldarævintýri verður á Siglufirði. Á Akureyri verður í fyrsta skipti boðið upp á Sumarleika þar verður íbúum og gestum bæjarins er gefinn kostur á að spreyta sig í fjallgöngum, þríþraut og fleiru. Austur á Neskaupsstað verður Neistaflug og á Flúðum verður boðið upp á tónleika og barnaskemmtun að ógleymdum traktoratryllingi sem fer fram klukkan fjögur á laugardag.

Þjóðhátíð í Vestmannaeyjum hefst svo í kvöld með hinu sívinsæla Húkkaraballi en þjóðhátíð nær hámarki á sunnudag með brekkusöng í Herjólfsdal á sunnudagskvöld klukkan rúmlega ellefu og verður hann í beinni útsendingu á Stöð 2.