Holugeitungurinn lítið sést þetta sumarið

„Þetta er örugglega í hag þeirra sem hræðast geitunga en ef menn verða ekki varir við það sem þeir hræðast er það alltaf gott,“ segir Erling Ólafsson, skordýrafræðingur hjá Náttúrufræðistofnun Íslands, en sú óvanalega staða er komin upp að lítið sem ekkert hefur sést í holugeitunginn það sem af er sumri.

„Það er lítið farið að bera á honum. Það á þó líklega eftir að hressast eitthvað þegar líður á sumarið,“ segir Erling en það eru einungis trjágeitungarnir sem eru sýnilegir núna.

Munurinn á þessum tveimur tegundum geitunga er einkum sá að trjágeitungar eru árásargjarnir þegar þeir eru ónáðaðir við búin og geta þá stungið, en þeir eru þó yfirleitt til friðs. Holugeitungar eru kvikir og er auðvelt að fá þá upp á móti sér. Þeir sækja í mat og drykki fólks sem situr úti í garði. Ákveði þeir að ráðast til atlögu stinga þeir sér gjarnan inn undir föt, upp í ermar og ofan í hálsmál til að athafna sig.

Erling segist ekki vita ástæðu þess að holugeitungarnir séu ekki komnir á stjá. „Ef eitthvað gengur á í náttúrunni er yfirleitt eitthvað flókið á bak við það og það er ekki ein skýring á neinu. Náttúran er stórt samspil þar sem eitt leiðir af öðru,“ segir Erling og bætir við að holugeitungurinn hafi átt erfitt á Íslandi undanfarin ár og mögulega sé ástæðan sú að Ísland sé einfaldlega ekki landið fyrir hann. „Hann er kannski bara farinn að fatta það. Við skulum vona að svo sé.“

Á vef Náttúrufræðistofnunar segir að holugeitungur sé tvílitur, svartur og gulur. Hann þekkist meðal annars á örvarlaga svörtum bletti á gulu andliti og jafnbreiðum, gulum, hliðstæðum röndum á frambol. Trjágeitungar séu hins vegar dekkri en aðrir geitungar og þekkist meðal annars á rauðleitum bletti framarlega á hliðum afturbols.

Þessi frétt birtist upphaflega í Fréttablaðinu