Gífurleg öryggisgæsla er fyrir utan Stade de France leikvanginn í Saint Denis í Frakklandi vegna leiks Íslands og Frakklands sem hefst innan skamms. Dæmi eru um það að öryggisgæslan hafi bakað vandræði fyrir einhverja gesti.



Samkvæmt fréttamanni Vísis á svæðinu eru dæmi um pör þar sem annar aðilinn fór inn á undan með miðana fyrir báða. Eftir að inn á völlinn er ekki unnt að fara út á ný til að koma hinum miðanum á hinn aðilann.



Aðrir hafa lent í því að ætla að hitta einhvern sem er með miðann en sem stendur getur það reynst þrautin þyngri að komast um París. Lögreglumenn beina fólki ákveðnar brautir og þú hefur val um að fara þær eða fara ekkert. Þá hafa lögreglumenn verið duglegir við að handtaka miðabraskara fyrir utan völlinn.



Inn á hópnum Ferðagrúppa fyrir EM 2016 eru að minnsta kosti tvö dæmi um aðila sem keyptu miða af Birni Steinbekk. Sá ætlaði að afhenda þá í París en var ókominn. Í samtali við Vísi sagði Björn að hann væri á harðahlaupum um borgina til að afhenda miðana og hann mætti alls ekki vera að því að láta blaðamenn tefja þá för.



Blaðamaður Vísis, staðsettur í París, mætti þremur aðdáendum sem voru á hlaupum að leita að Birni. Þeir ætluðu að hitta hann á hóteli þar sem hann ætlaði að afhenda þeim miðana. Það hefur ekki gengið enn.



Uppfært 18.57 Einhverjir virðast hafa haft upp á Birni Steinbekk. Þeirra á meðal er Ragnar Heiðar Sigtryggsson. Hann sendir inn í Ferðagrúppuna að miðarnir séu stolnir og að þeim hafi ekki verið hleypt inn á völlinn á þeim.



Leikur Íslands og Frakklands hefst klukkan 19.00.