Sýknaður af ákæru um að hafa tekið upp kynlífsmyndband án vitundar kærustu

Fjölskipaður Héraðsdómur Reykjaness hefur sýknað karlmann af ákæru um að hafa án vitundar þáverandi kærustu sinnar tekið upp myndband af þeim í kynlífsathöfnum í lok sumars 2014. Konan bar því við að hafa fundið tuttugu mínútna myndskeið í tölvu mannsins þar sem hún sást meðal annars veita honum munnmök. Myndskeiðið fannst hins vegar ekki við leit í tölvunni en konan sagðist hafa eytt því þegar hún fann það óvænt í tölvunni.

Samband mannsins og konunnar stóð stutt yfir, eða aðeins í nokkrar vikur. Konan lagði fram kæru hjá lögreglu 12. september og sagðist sex dögum fyrr hafa fundið myndbandið í tölvu mannsins. Ákærði neitaði sök og sagði ástæðu ákærunnar þá að hann hefði hætt með konunni. Hann hefði aldrei tekið upp nein myndskeið af kynlífsathöfnum með hennar samþykki.

Húsleit fór fram á heimili ákærða í þeim tilgangi að haldleggja síma- og tölvubúnað. Ekki fundust nothæfar upptökur í tölvunni um meint kynferðisbrot. Þar fundust þó smámyndi (e. thumbnails) sem virtust sýna fólk í ástaratlotum. Konan sagði myndirnar vera af þeim tveimur í atlotum. Maðurinn neitaði alfarið að hafa tekið upp myndskeið og auk þess hefðu allir aðgang að tölvunni. Hann hefði ekkert þar að fela. Önnur smámyndanna væri af öðrum manni en hin af honum þar sem hann lá upp í sófa með dóttur sinni.

Ítarleg rannsókn á tölvu mannsins leiddi í ljós að fjölmargar myndbandsupptökur fundust sem áttu sér stað árið 21 ágúst sem hægt hafi verið að skoða. Hafi þær sýnt kynferðislegt athæfi en verið mjög stuttar. Síðasta upptakan hafi verið tekin upp þann 21. ágúst og staðið í rúmar tuttugu mínútur. Hins vegar hafi ekki verið hægt að sjá hvaða efni hafi verið af henni.

Lengd upptökunnar og tímasetning voru í samræmi við orð brotaþola en engin leið var að sjá hvað hafði verið á upptökunni. Dómurinn mat framburð ákærða og brotaþola trúverðugan. Hins vegar væri verulegur vafi á tilvist og efni meinta myndskeiðsins og hefði ákæruvaldinu ekki tekist að sanna sekt ákærða. Var hann því sýknaður af ákærunni.

Dóminn má sjá hér.