Lögðu hald á töluvert af ólögleglegum stinningarlyfjum í tengslum við stóra alþjóðlega aðgerð

Fölsuð krabbameinslyf, alnæmislyf, sykursýkispróf og eftirlíkingar af tannlækna- og skurðáhöldum voru meðal þeirra ólöglegu lyfja og lækningatækja sem gerð voru upptæk í nýafstaðinni alþjóðlegri aðgerð sem náði til 103 landa. Beindist hún að vefverslun þar sem ólögleg og hugsanlega lífshættuleg lyf voru á boðstólum, að því er fram kemur í tilkynningu frá tollstjóra.

Íslenska tollgæslan og Lyfjastofnun tóku þátt í aðgerðinni sem gerð var á vegum Interpol með aðkomu meðal annars Alþjóða tollastofnunarinnar og Europol. Í tengslum við aðgerðina hér á landi var lagt hald á töluvert af ólöglegum stinningarlyfjum. Meðan hún stóð yfir hafði Matvælastofnun aukið eftirlit með fæðubótarefnum, sem grunur lék á að gætu innihaldið lyfjavirk efni. Nokkur mál af því tagi komu einnig upp.

Tollgæslan og Lyfjastofnun nutu liðsinnis embættis ríkislögreglustjóra og tengslaskrifstofu Íslands hjá Europol við aðgerðina sem unnin var undir heitinu Pangea IX.

Alls voru 393 handteknir víða um lönd og hald lagt á 12. 2 milljónir eininga af ólöglegum og mögulega lífshættulegum lyfjum að andvirði 53 milljónir dollara. Þá var 4.932 vefsíðum sem buðu upp á slíkan varning lokað. 334.000 pakkar voru rannsakaðir og af þeim voru 170.340 haldlagðir.

Sem dæmi um umsvif ólöglegrar vefverslunar nefnir tollstjóri að í Ungverjalandi fundust 65.000 töflur af kvíðastillandi lyfjum faldar í aftursæti og varahjólbarða bifreiðar. Í Austurríki var stöðvuð starfsemi neðanjarðarverksmiðju þar sem framleidd voru fölsuð lyf, þar á meðal sterar.