Flæddi yfir gröfu sem notuð var til að draga Jón Hákon á land

Dragnótarbáturinn Jón Hákon sem sökk síðastliðið sumar hefur verið dreginn í fjöru á Ísafirði. Það var gert í dag.

Aðgerðirnar gengu vel þangað til stærðarinnar grafa sem notuð var í aðgerðunum bilaði. Grafan drap því á sér og svo flæddi yfir hana þegar kom flóð. Skjótt getur skipst á milli flóðs og fjöru í fjöruborðinu en þegar aðgerðir hófust var fjara.

Þetta kom þó ekki að sök og er Jón Hákon nú vel skorðaður í fjörunni. Þegar Vísir náði tali af Jóni Árelíusi Ingólfssyni, rannsóknarstjóra hjá rannsóknarnefnd samgönguslysa, í kvöld var hann á leið heim af vettvangi. 

„Báturinn er kominn á öruggan stað en það þarf að koma honum ofar til að geta unnið í honum. Við erum bara í þægilegu spennufalli að báturinn sé kominn á sinn stað.“ 

Báturinn sökk í Ísafjarðardjúpi síðastliðið sumar og fórst einn maður úr áhöfninni. Báturinn verður rannsakaður þegar tekst loks að koma honum á land en varðskipið Þór hefur í vikunni unnið að því að koma bátnum til Ísafjarðar. Í gær var dælt upp úr honum sjó svo hægt væri að draga hann á land í dag.

Lögreglan á Ísafirði segir að nú sé verið að bíða eftir að fjari svo hægt sé að gera við gröfuna. Búist er við því að það verði þó ekki fyrr en á morgun. Samkvæmt lögreglu voru menn á vettvangi bjartsýnir á að grafan sé ekki ónýt þó að flætt hafi inn í hana.