Lífeyrisþegar taldir þurfa að greiða meira

Tveir þriðju hlutar aldraðra og lífeyrisþega munu greiða mun hærri upphæðir fyrir heilbrigðisþjónustu ef Alþingi samþykkir frumvarp heilbrigðisráðherra þar sem þak er sett á greiðslur í heilbrigðiskerfinu. Þetta er mat Gunnars Alexanders Ólafssonar heilsuhagfræðings.

Með frumvarpinu yrði þak sett á greiðslur í heilbrigðiskerfinu. Almennir notendur ættu að greiða að hámarki 95.200 krónur á tólf mánaða tímabili en lífeyrisþegar og aldraðir að hámarki 63.500 krónur.

Á fundi velferðarnefndar BSRB benti Gunnar á að þótt greiðslur lækki að meðaltali um 36 prósent hjá þeim hópi aldraðra og lífeyrisþega sem noti heilbrigðiskerfið mest hækki greiðslur hjá meirihlutanum í þessum hópi.

Um 37 þúsund manns eru í þeim hópi sem Gunnar telur að myndu greiða meira. Sá hópur greiðir nú um 687 milljónir króna árlega en verði frumvarpið samþykkt segir Gunnar að upphæðin hækki í 1.190 milljónir króna. Hækkunin myndi jafngilda 13.400 króna aukningu á mann.

Fréttin birtist fyrst í Fréttablaðinu 2. júní