Lögreglumanninum boðið starfið sitt aftur

Fíkniefnalögreglumaður sem sætti ásökunum um spillingu hefur ekki ákveðið hvort hann muni fara fram á skaðabætur. Málið var fellt niður í gær, eftir ítarlega rannsókn sem leiddi ekkert saknæmt í ljós og mun hann nú snúa aftur til starfa.

Tæplega hálft ár er nú liðið síðan lögreglumanninum var vikið frá störfum á meðan ásakanir um spillingu á hendur honum voru rannsakaðar. Snorri Magnússon, formaður Landssambands lögreglumanna, telur að þessi viðbrögð lögreglustjórans á höfuðborgarsvæðinu hafi verið allt of hörð.

„Við hefðum viljað sjá embættið bregðast öðru vísi við og gæta samræmis og sannmælis í ákvörðunartöku sinni. Í svona málum höfum við verið að sjá það að ákvörðunartakan um að víkja mönnum frá tímabundið virðist vera mjög handahófskennd eftir því hvaða mál er um að ræða og jafnvel hvaða einstaklinga er um að ræða,“ segir Snorri.

Klofningur innan deildarinnar

Niðurstaða héraðssaksóknara er afdráttarlaus um að enginn fótur hafi verið fyrir ásökununum á hendur lögreglumanninum. Þær virðast hafa sprottið upp úr ágreiningi meðal starfsmanna fíkniefnalögreglunnar. Landssambandið fer nú fram á að Sigríður Björk Guðjónsdóttir lögreglustjóri lýsi opinberlega yfir trausti á lögreglumanninn. Snorri segir að mál sem þessi hafi áhrif á líðan og starfsöryggi lögreglumanna almennt.

„Það gerir það að sjálfsögðu, því starf okkar er einu sinni þannig að það er ekkert flókið að henda svona ásökuknum út í loftið. Við þeim verður að sjálfsögðu að bregðast ef þær koma fram, en það verður þá að gera með samræmdum hætti og að alls meðalhófs sé gætt. Því þetta eru mjög alvarlegar og íþyngjandi stjórnvaldsákvarðanir sem eru teknar í þessum málum.“ 

Rýri ekki traust á lögreglunni

Aðspurður segist Snorri vissulega hætta á því að mál eins og þetta og fleiri sem borið hefur á innan lögreglunnar undanfarin misseri hafi neikvæði áhrif á traust almennings gagnvart lögreglu.

„Það getur gert það þá en ég vona ekki, og ég vona að fólk átti sig á því að þessi mál eru skoðuð komi þau upp. Það hefur sýnt sig í gegnum tíðina að það er gert. Það er farið mjög ítarlega yfir svona mál þegar þau koma fram og þau rannsökuð algjörlega ofan í kjölinn eins og sést berlega á þessari rannsókn héraðssaksóknara í þessu máli.“

Snýr aftur til starfa á næstu dögum

Snorri segir að eftir eigi að skoða í samráði við lögreglumanninn sjálfan og lögmann Landssambandsins hvort farið verði í skaðabótamál vegna tekju- og ærumissis lögreglumannsins, en komi til þess muni lögreglumaðurinn njóta fullan stuðning félagsins.

Lögreglustjórinn á höfuðborgarsvæðinu er erlendis og hefur ekki tjáð sig um málið í dag en þær upplýsingar fengust frá aðstoðarlögreglustjóra að lögreglumanninum hafi í dag verið boðið að mæta aftur til fyrri starfa og að hann muni gera það á næstu dögum.