Tíu meðmælalistar komnir í hús í síðasta kjördæminu

Tíu frambjóðendur til embættis forseta Íslands skiluðu í dag inn meðmælalistum í Norðausturkjördæmi. Tekið var á móti meðmælalistum til klukkan tvö en frambjóðendur hafa frest til föstudags til að lagfæra lista sína.

Norðausturkjördæmi er eina kjördæmi landsins sem ekki óskaði eftir að fá listana í hendur á föstudag, viku áður en framboðsfrestur rennur endanlega út, heldur í dag. Móttaka hófst í menningarhúsinu Hofi á Akureyri klukkan níu í morgun.

Yfirkjörstjórnir munu næstu daga renna yfir listana og gefur út vottorð ef þeir eru í lagi. Meðmælendur þurfa að vera kjörgengir í því kjördæmi sem þeir skrifa undir í og ekki má skrifa undir hjá fleiri en einum frambjóðanda.

Uppfært 15.20: Í upphaflegri útgáfu þessarar fréttar sagði að ellefu frambjóðendur hefðu skilað inn listum í Norðausturkjördæmi en það rétta er að þeir voru tíu. Tekið skal fram að aðrir frambjóðendur geta áfram skilað inn listum þar til frestur rennur endanlega út.