Lögregla varar við tvenns konar internetsvindli

Lögreglan á höfuðborgarsvæðinu varar við tvenns konar internetsvindlum sem borist hafa ábendingar um yfir helgina.

„Önnur er hjálparbeiðni vinar í útlöndum og hin er svindl lán,“ segir á Facebook-síðu embættisins. Þar lýsir lögreglan nákvæmlega hvað felst í svindlunum. Lögreglan segir hjálparbeiðnina hvimleitt svindl.

„Hér hefur vinur þinn eða kunningi lent í því að missa stjórn á fésbókarreikningnum eða netfangi sínu,“ skrifar lögreglan og birtir meðfylgjandi mynd. 

„Það gerist yfirleitt þannig að viðkomandi hefur opnað fésbókina eða netpóst á vírussýktri tölvu sem afritar aðgangsupplýsingar og sendir á tölvuþrjóta. Þetta eru erfiðustu vírusarnir í dag og eru kallaðir Trójuhestar eftir þjóðsögunni um Tróju þegar Grikkir laumuðu sér inn í borgina í líkneski af risahesti. Þessi vírus skemmir ekkert en afritar allar aðgerðir og sendir á þrjótanna sem yfirleitt selja slíkar upplýsingar áfram. Þeir sem nota síðan upplýsingarnar senda út hjálparbeiðni eins og vinur/vinkona/kunningi sé í útlöndum og sé búinn að tapa aleigunni og vanti ríflega 1000 evrur eða dollara til að bjarga sér. Það er náttúrlega bull. Í heimi nútíma samskipta þarf ekki að bjarga sér á þennan hátt og ekki taka mark á slíkum skeytum. Það dapurlega er að komist eigandinn aftur yfir aðganginn sinn er oft búið að eyða öllum gögnum og pósti af reikningnum sem þrjótarnir gera til að fela slóð sína.“ 

Þá fjallar lögreglan um svindl sem snýr að lánatilboði. 

„Þá eru sumir að fá lánatilboð í netpóstinn sinn. Oft á ævintýralegum kjörum. Það eins og annað sem er of gott til að vera satt er einmitt of gott til að vera satt. Markmið svindlarans er að fá þig til að svara og svo er þér sent tilboð sem er ævintýralega gott. En til að fá það þá þarftu að borga skráningargjöld og þar er verið að svíkja þig. Ef þig vantar lán þá talar þú við lánastofnun. Það er enginn að fara að senda þér frábært lánatilboð í einkapósti á einhvern handahófskenndan hátt.“

NÝJAR NETSVINDLS FRÉTTIRHJÁLPARBEIÐNIR OG LÁNATILBOÐVið höfum verið að fá tvennskonar tilkynningar yfir helgina. Ö...

Posted by Lögreglan á höfuðborgarsvæðinu on Monday, April 11, 2016