Mikið hefur dregið úr notkun rafmagns á íslenskum heimilum

Þökk sé orkusparandi perum og sparneytnari heimilistækjum að árleg meðaltalsnotkun heimila á rafmagni hefur minnkað úr 4,9 megavattstundum (MWh) árið 2009 niður í 4,5 MWh árið 2014.

Rafmagnsnotkun heimila hefur því minnkað um átta prósent frá 2009.

Þetta kemur fram í nýrri raforkuspá orkuspárnefndar sem áætlar að orkunotkun hvers heimilis muni minnka niður í 4 MWh á næstu árum.

Í frétt á vef atvinnuvega- og nýsköpunarráðuneytisins segir að helstu orsakir minni raforkunotkunar á heimilum landsmanna séu breytingar í lýsingu þar sem mun orkugrennri perur en glóperurnar eru komnar til sögunnar og heimilistæki hafa orðið sparneytn­ari.

Á móti kemur að tækjum á heimilum hefur farið fjölgandi en flestar nýjar tækjategundir eru orkugrannar.

Í raforkuspánni kemur fram að lengi vel hafi almenn heimilisnotkun utan rafhitunar farið vaxandi og náði hún hámarki árið 2009. Núna hefur hún hins vegar ekki verið jafn lítil í áratug.

Gert er ráð fyrir að fyrrnefndar breytingar í lýsingu fari einnig að skila sér í garðyrkju eftir nokkur ár og mun þá raforkunotkun í landbúnaði minnka.

Haldi þróunin áfram eins og spáin gerir ráð fyrir þá nemur árlegur þjóðhagslegur sparnaður um tveimur milljörðum króna. Þetta hefur líka það í för með sér að nú á tímum umframeftirspurnar eftir raforku hafa orkufyrirtækin 130 GWst til sölu án þess að leggja í kostnað við nýjar virkjanir.

Til samanburðar er orkuvinnsla Steingrímsstöðvar 122 GWst/ári. Rekstur Steingrímsstöðvar hófst árið 1959 og er uppsett afl hennar 27 megavött (MW) – en þar er virkjað fall Efra-Sogs úr Þingvallavatni í Úlfljótsvatn.