Litríkir sokkar og vettlingar í Hörpu

Barnamenningarhátíð var sett í Hörpu að viðstöddu fjölmenni fyrr í dag en öllum nemendum í fjórða bekk í Reykjavík var boðið að vera á staðnum.

Borgarstjórinn í Reykjavík, Dagur B Eggertsson, setti hátíðinna með aðstoð viðstaddra og svo var boðið upp á fjölda skemmtiatriða, dans, söng og leiklist, eins og sjá má á meðfylgjandi myndskeiði.

Meðal þeirra sem stigu á svið voru dansarar úr Dansskóla Brynju Péturs, krakkarnir úr Made in Children og atriði úr leikritinu Umhverfis jörðina á 80 dögum.

Þá stigu Pollapönkarar á svið og fluttu meðal annars lag Barnamenningarhátíðar, Litríkir sokkar og vettlingar, en lagið má sjá og heyra hér að neðan.

Boðskapur Pollapönkara er að fagna margbreytileikanum í samfélaginu og til að sýna það í verki voru allir hvattir til að mæta til leiks með marglita sokka.

Fjölbreytt dagskrá verður í öllum hverfum borgarinnar alveg fram á sunnudag undir merkjum Barnamenningarhátíðar.

„Það verður dagskrá alveg fram á sunnudag. Það verður mikið um að vera alla helgina auk þess sem það verður vegleg dagskrá í hverju einasta hverfi borgarinnar á sumardaginn fyrsta. Ég vona bara að fólk taki þátt því þetta er þátttökuhátíð sem er stíluð inn á það að bjóða upp á menningu fyrir börn og foreldra þeirra þeim að kostnaðarlausu,“ sagði Áshildur Bragadóttir, forstöðumaður Höfuðborgarstofu.

„Það eru krakkarnir sjálfir sem eru að skapa menninguna og búa hana til.“