Bollakökur og vélmenni

Nokkrir nemendur í verkfræðideild Háskóla Íslands sýndu í dag lokaverkefni sín úr áfanga sem nefnist tölvustýrður velbúnaður. Meðal þess sem þar var til sýnis var eftirmynd vélmennisins BB-8 úr nýjustu Star Wars kvikmyndinni.

BB-8 er úr smiðju þeirra Sverris Karls Björnssonar, Elíasar Steins Leifssonar, Kristins Arnar Björnssonar og Arnar Dúa Kristjánssonar.

„Það voru tveir úr hópnum sem voru ekki búnir að sjá myndina áður en við byrjuðum, en þeir eru búnir að því núna,“ segir Sverrir Karl.

„Við notuðum ljósaskerm af ljósastaur í stóru kúluna og plastskál fyrir hausinn. Þrívíddarprentaði hausinn sem við ætluðum að nota var of þungur svo við þurftum að nota plastskálina frekar,“ segir Sverrir. 

Og það voru fleiri áhugaverð lokaverkefnin í tölvustýrðum vélbúnaði. Þau Kristín Guðmundsdóttir, Júlía Arnardóttir og Njáll Gunnarsson smíðuðu svokallaðan skreytingameistara.

„Við ákváðum að útbúa sérstaka skreytivél, en við Júlía erum einu stelpurnar í þessum áfanga og þekkjum vel það vandamál að þurfa að skreyta of margar bollakökur,“ útskýrir Kristín. „Okkur datt því í hug að gera svona færiband sem snýr kökunum og þær stoppa á þremur stöðum í ferlinu. Á fyrstu stöðinni er sett krem á kökuna, þaðan fer hún í kurlara og þar er marglitu kökuskrauti dreift yfir þær. Að síðustu er þeim svo skutlað yfir á rennibraut þar sem þau renna niður á disk sem svo er hægt að bera fram.“

Hún segir þetta vissulega hafa verið ónsnyrtilegasta verkefnið á háskólaferlinum hingað til.

„Já allt þetta krem og kökuskraut hefur dreifst út um allt,“ segir Kristín.

Hún bætir við að líklegt sé að þau komi til með að bjóða upp á vel skreyttar bollakökur í fyrirhuguðum útskriftarveislum sínum í vor, það verði að nýta vélina.