Vilja fjölga félagslegum íbúðum

Minnihlutinn í bæjarráði Hafnarfjarðar vill að bæjaryfirvöld hefji viðræður við ASÍ um aðkomu þess að uppbyggingu félagslegra íbúða í Hafnarfirði. Í bókun minnihlutans í bæjarráði um málið segir að 240 félagslegar íbúðir séu í Hafnarfirði og þörf sé á því að fjölga félagslegum íbúðum í bænum. Leggja þau til að bæjarstjóra verði falið að óska eftir viðræðum við ASÍ um aðkomu og samstarf.

„Það er ekki hlutverk sveitarfélaga að kynda bálið á fasteignamarkaði með því að selja lóðir á verði sem er langt umfram þann kostnað sem þau hafa af þeim, en það er svo sannarlega hlutverk sveitarfélaga að tryggja nægt framboð félagslegs húsnæðis,“ segir Gunnar Axel Axelsson, bæjarfulltrúi Samfylkingarinnar.

Afgreiðslu málsins var frestað þar til á næsta fundi bæjarráðs.

Fréttin birtist fyrst í Fréttablaðinu 1. apríl.