Vetrarleikar öflug landkynning

Heimsþekktir atvinnumenn frá Evrópu og Norður-Ameríku auk margra af bestu snjóbrettaköppum landsins munu etja kappi í snjóbrettafimi á Akureyri í kvöld á stærsta stökkpalli sem gerður hefur verið á Íslandi. Einnig verður á dagskránni skíðastökk með frjálsri aðferð og vélsleðastökk. Er þetta liður í hátíðinni Íslensku vetrarleikarnir sem haldnir eru á Akureyri.

Meðal keppenda í kvöld eru til að mynda Sammy Carlson og Scotty Lago frá Bandaríkjunum sem hafa báðir unnið til verðlauna á stærstu mótum heims. Einnig hefur Lago unnið til bronsverðlauna á Ólympíuleikum.

Erik Newman, viðburðastjóri hjá Viðburðastofu Norðurlands, segir þessa leika hafa sprengt utan af sér og séu þeir nú ein stærsta hátíð sinnar tegundar á norðlægum slóðum. „Þetta byrjaði sem lítið mót en núna hefur þetta breyst í eitthvert risastórt markaðsátak fyrir allt Norðurland. Erlend markaðssetningarfyrirtæki eru með okkur í þessu og hér eru nú um fimmtíu erlendir fréttamenn vegna vetrarleikanna á Akureyri,“ segir Erik. „Erlent fyrirtæki, 360 Media Adventures, ætlaði sér til dæmis að búa til þátt um ferð til Íslands en það breyttist í að koma hingað norður og fjalla um mótið, Norðurland og upprennandi brettasnillinga hér á landi. Þetta er stærra en okkur óraði fyrir í upphafi.“

Erik segir ekki þrautalaust að fá þessa erlendu keppendur til landsins en í því felist mikið tækifæri til að auglýsa Norðurland. „Þessir atvinnumenn koma á launum frá okkur og flug og gisting er greidd af okkur einnig. Á móti kemur að við fáum mikla kynningu í erlendum miðlum og því er um gríðarlega landkynningu að ræða,“ segir Erik.

Hátíðin heldur áfram á laugardeginum þar sem meistaramót Íslands á snjóbrettum og skíðum fer fram í Hlíðarfjalli en einnig verður þrautakeppni um kvöldið í miðbæ Akureyrar. Þá keppa ofurhugar í fjallaskíðamennsku af toppi Múlakollu á Tröllaskaga.