Smíðuðu pókerborð upp á gamanið

Félagarnir Tómas Nielsen og Þráinn Orri Jónsson tóku höndum saman á dögunum og smíðuðu sitt eigið pókerborð frá grunni. Þrátt fyrir að hafa ekki spilað mikinn póker í gegnum tíðina þá líta þeir á borðið sem hvata til þess að hitta vinina oftar og taka leik. Smíðin tóku aðeins fjóra daga en strákarnir útiloka ekki að taka að sér frekari handverk í framtíðinni.



„Ástæðan fyrir því að við ákváðum að smíða borðið var einfaldlega sú að ég fékk þessa flugu í hausinn. Ég vissi að Tómas væri í smíðaáföngum uppi í Tækniskóla og hann var til í að stússast í þessu með mér. Við höfum aðeins verið að spila póker í gegnum tíðina en alls ekki oft. Vonandi verður þetta hvati fyrir því að spila meira enda erum við nokkrir í vinahópnum sem höfum áhuga á þessu og við borðið komast sex manns,“ segir Þráinn Orri en þetta er í fyrsta skiptið sem hann tekur í verkfærin.

Smíðin á borðinu tók aðeins fjóra daga en gekk þó ekki vandræðalaust fyrir sig. „Við hittumst eftir kvöldmat þessa fjóra daga og vorum að dúlla okkur í þessu. Við gerðum nokkur byrjendamistök en það er bara ósköp eðlilegt held ég. Við vorum aðallega að fylgja uppskriftum af Youtube en svo ákváðum við líka að bæta við okkar handbragði,“ segir Tómas en þeir ákváðu að gera innbyggða glasahaldara til þess að gera stemninguna yfir spilunum ennþá betri.



Það var margt sem þurfti að ganga upp til þess að borðið yrði að veruleika. „Við vorum það heppnir að pabbi Tomma er með ógrynni af Festool-verkfærum sem við fengum að ganga í. Við fundum allt til í hinum ýmsu verslunum og notuðumst mikið við Google,“ segir Þráinn.

Strákarnir hafa nú þegar tekið fyrsta leikinn á borðinu en hann gekk ekki eins og þeir höfðu vonað. „Við töpuðum báðir þannig að ætli við þurfum ekki að æfa okkur betur áður en við bjóðum strákunum að spila næst,“ segja þeir en bæta við að það mikilvægasta sé að hafa með sér spilastokk, einn kaldan og góða skapið.

 

Fréttin birtist fyrst í Fréttablaðinu 9.apríl.