Aðeins sjö öldrunarheimili af 74 eru með þjónustusamning

Einungis hafa verið gerðir þjónustusamningar við sjö af 74 öldrunarheimilum í landinu. Ríkisendurskoðun telur mikilvægt að hraða samningum við heimilin, segir í nýrri skýrslu stofnunarinnar.

Árið 2013 benti Ríkisendurskoðun á að velferðarráðuneytið hefði einungis gert þjónustusamninga við átta af 73 öldrunarheimilum í landinu. Stofnunin hvatti ráðuneytið til að bæta úr þessu og efla eftirlit sitt með þjónustu og rekstri heimilanna.

Í nýrri eftirfylgniskýrslu Ríkisendurskoðunar kemur fram að samningagerð við öldrunarheimili og eftirlit með þjónustu þeirra og rekstri séu nú lögbundin verkefni Sjúkratrygginga Íslands.

Samkvæmt upplýsingum frá þeirri stofnun liggja fyrir drög að rammasamningi við hjúkrunarheimili sem sinna öldrunarþjónustu. Áætlað er að búið verði að semja við heimilin á þeim grundvelli á þessu ári. Af þessum sökum telur Ríkisendurskoðun ekki rétt að ítreka ábendingar sínar frá árinu 2013. Stofnunin bendir þó á að samningagerðin hafi gengið hægt og að nú séu einungis í gildi þjónustusamningar við sjö af 74 öldrunarheimilum í landinu. Stofnunin telur mikilvægt að hraða þessari vinnu.

Samkvæmt athugun Ríkisendurskoðunar hafa framlög ríkissjóðs til reksturs öldrunarheimila aukist um sex milljarða króna frá 2013, eða um 27 prósent. Samkvæmt ríkisreikningi var framlagið tæplega 22 milljarðar árið 2013 en gert er ráð fyrir 28 milljarða framlagi árið 2016.

Í febrúar síðastliðnum veittu 95 stofnanir á landinu þjónustu í rýmum fyrir aldraða. Þar af voru 74 stofnanir reknar af öðrum en ríkinu og bjóða 28 þeirra aðeins upp á dagdvalarrými.