Frestur ríkisstjórnar að renna út

Ráðherrar ríkisstjórnarinnar hafa lagt fram fjörutíu prósent þeirra mála sem þeir boðuðu með þingmálaskrá í upphafi vetrarþings. Framlagningarfrestur nýrra frumvarpa rennur út á morgun.

Sem dæmi um frumvarp sem beðið er eftir er frumvarp iðnaðar- og viðskiptaráðherra um kennitölu­flakk. Stöð 2 greindi frá því í janúar að ríkisskattstjóri áætlaði að ríkissjóður færi á mis við 80 milljarða króna vegna skatta­undan­skota á ári hverju og að kennitöluflakk væri hluti vandans.

Í yfirlýsingu frá ASÍ um sömu mundir sagði að lengi hefði ríkt andvaraleysi hjá stjórnvöldum gagnvart kennitöluflakki.

Þá er beðið eftir frumvarpi um ný útlendingalög. Þverpólitísk þingmannanefnd kynnti drög að frumvarpinu í ágúst í fyrra. Er frumvarpinu meðal annars ætlað að stuðla að samræmingu laga um útlendinga og laga um atvinnuréttindi útlendinga. Þá eru nýmæli í frumvarpinu að áhersla sé lögð á réttindi barna í samræmi við alþjóðlegar skuldbindingar og reynt að tryggja börnum vernd. Fréttablaðið greindi frá því í vetur að í einhverjum tilfellum væri brottvísun barna sem sækja um hæli hér á landi brot á barnasáttmála Sameinuðu þjóðanna.

Meirihluti húsnæðisfrumvarpa félagsmálaráðherra er fram kominn en þó vantar enn frumvarp um Íbúðastofnun og um húsnæðislán. Samkvæmt heimildum Fréttablaðsins er ólíklegt að þessi frumvörp komi fram en þau fela í sér róttækar breytingar á Íbúðalánasjóði og húsnæðislánakerfinu.

Þá er ekki komið fram frumvarp um að fjölga seðlabankastjórum úr einum í þrjá. Hugmyndir forsvarsmanna ríkisstjórnarinnar um þessa breytingu var gagnrýnd mjög þegar hún kom fram. Jón Daníelsson, prófessor í hagfræði og fjármálum við London School of Economics, sagði fjölgunina misráðna í mars í fyrra.

„Fyrir mér er þetta alveg skýrt, að það á að vera einn seðlabankastjóri og tveir eða þrír undirmenn hans. Það er svo hægt að skilgreina það nákvæmlega hvernig valdahlutfallið er á milli þessara manna,“ sagði Jón á Bylgjunni við það tilefni.

Heilbrigðisráðherra hefur staðið sig best og skilað flestum sinna frumvarpa ef frá eru talin frumvarp um tóbaksvarnir og frumvarp um breytingu á lögum um málefni aldraðra. Þá hefur hann ekki enn skilað þingsályktunartillögu um heilbrigðisstefnu til ársins 2020. Þó er beðið með eftirvæntingu eftir skýrslu ráðherra um mótun stefnu til að draga úr skaðlegum afleiðingum vímuefnaneyslu. Kristján Þór Júlíusson heilbrigðisráðherra hefur verið sá ráðherra sem hefur talað mest í þá átt að vilja afglæpavæða fíkniefni.