Sankar að sér Eyjafjallajökulssögum

„Aðdragandinn er líklega sá að ég lenti sjálfur í basli í gosinu. Ég var í Noregi og kom heim eftir krókaleiðum. Það var svo súrrealískt ferðalag að það lá við að ég hefði gaman af því,“ segir Gísli Pálsson mannfræðingur um rannsóknarverkefni sitt Volcanologues. Í tengslum við það safnar hann sögum sem gerðust þegar um tuttugu þjóðir ákváðu að stöðva flugumferð um lofthelgi sína vegna eldfjallaösku frá Eyjafjallajökli 2010. Talið er að tíu milljónir hafi breytt ferðaplönum vegna þess.



Í stað þess að heimferðin frá Ósló tæki þrjá tíma hjá Gísla urðu þeir þrjátíu og sex. Löng bið og þvælingur á flugvelli í Bretlandi þar sem bráðabirgðafyrirkomulag ríkti í afhendingu á töskum og inntékki, flug þaðan til Akureyrar og rútuferð þaðan suður um nótt er í reynslubankanum.

„Þarna var fólk allt í sömu stöðu og auðvitað fór allt vel. Ég var oft á fundum erlendis um þetta leyti og hitti þar fólk sem hafði lent í alls konar veseni vegna gossins, misst af flugi, ekki komist til að sækja krakkana í skólann eða á áríðandi fund. Það hvarflaði að mér þá að sanka að mér frásögnum en fannst staðan pínu vandræðaleg, eins og við Íslendingar værum valdir að gosinu og lá við að ég skammaðist mín fyrir að vera með eldfjallið í bakgarðinum.“

Nú kveðst Gísli vera að skrifa bók um Eyjagosið 1973 og það hafi dregið hann út í pælingar um áhrif eldgosa á mannlíf. „Þá kom hugmyndin um sögusöfnun vegna Eyjafjallajökulsgossins upp á borðið aftur og ég vona að ég nái til fólks á samfélagsmiðlunum,“ segir hann og bendir fólki á að senda stutta frásögn og jafnvel myndir, teikningar eða önnur skjöl á netfangið volcanologues2010@gmail.com ásamt nafni og netfangi höfundar.

„Mig langar að birta sögurnar og gögnin á heimasíðu verkefnisins og í prentuðu úrvali,“ segir hann. „Því dramatískara sem efnið er, því betra, hvort sem það er frá Íslandi eða öðrum heimshlutum.“



Greinin birtist fyrst í Fréttablaðinu 30. mars.