Átak gegn heimilisofbeldi hefur skilað tveimur ákærum

Ákært hefur verið í tveimur málum eftir að átak lögreglunnar á Norðurlandi eystra og Akureyrarbæjar hófs fyrir ári. Enn er fjöldi mála í meðferð hjá lögreglunni. Halla Bergþóra Björnsdóttir lögreglustjóri segir átakið hafa gengið vel.

„Þetta samkomulag náði einungis til Akureyrar og þeirra sveitarfélaga sem Akureyri þjónustar með Félagsþjónustunni. Á þessu svæði frá 1. mars 2015 til og með 28. febrúar 2016 voru 16 skráð heimilisofbeldismál,“ segir Halla Bergþóra.

„Alls voru 24 mál skráð á tímabilinu þar á undan og tíu mál á sama tíma 2013-2014. Fjölgunin frá tíu málum 2014 í 24 mál nú skýrist af einhverri fjölgun mála en einnig af skýrari reglum um skráningu.“

Halla Bergþóra bendir á að enn sé verið að skoða verklag en að reynslan af átakinu hafi verið góð og samstarfið við Félagsþjónustu Akureyrarkaupstaðar gengið vel. „Öll þessi mál eru skráð sem kærur í málaskrá en tvö mál hafa farið í ákæruferli og enn eru mál í meðferð,“ segir hún.

„Ekki hefur verið tekin ákvörðun um áframhald átaksins en reynslan af því hefur verið góð.“

Þegar skrifað var undir viljayfirlýsinguna þann 25. febrúar í fyrra sagði lögreglustjóri þetta miklu máli skipta fyrir íbúa svæðisins.

„Við viljum vernda almannahagsmuni með því að ákæra í þessum málum og leiða þau til lykta,“ sagði lögreglustjórinn. 

Þessi grein birtist fyrst í Fréttablaðinu þann 31. mars.