Blár apríl hefst á morgun: Fólk hvatt til að klæðast bláu

Blár apríl hefst á morgun en það er stuðningsátak til að vekja athygli á einhverfu barna. Fólk er hvatt til að klæðast bláu og sýna þannig stuðning í verki. Haldnir verða ýmsir viðburðir í tilefni átaksins.

„Það er svo rosalega mikilvægt að við fögnum fjölbreytileikanum og ýtum undir styrkleika þá sem einhverf börn og fullorðnir hafa af því að þeir eru margir en oft vannýttir. Það er svo rosalega mikið hægt að gera og hjálpa þessum börnum til þess að hámarka getu sína og færni, bæði til þess að þeim líði vel með sjálf sig og í návist annarra,“ segir Ragnhildur Ágústsdóttir, formaður styrktarfélags barna með einhverfu, sem stendur fyrir Bláum apríl.

Hún hvetur alla til að taka þátt í deginum. „Við hvetjum alla til þess að klæðast bláu á morgun og sýna þannig stuðning í verki; mæta í bláu í skólann, vinnuna og taka myndir og setja inn á samfélagsmiðla og merkja þær með myllumerkinu #blárapríl,“ segir hún.

Haldnir verða styrktartónleikar í tilefni dagsins og rennur allur ágóði af miðasölu óskert til málefnisins, en safnað er fyrir gerð á uppbyggilegu fræðsluefni um einhverfu ætlað börnum. Hjálmar, Valdimar og Júníus Meyvant  koma fram á tónleikunum en nálgast má miða á miði.is.

„Þetta er tækifæri til að bæði hafa gaman og um leið að styrkja málefnið, þetta verða örugglega alveg frábærir tónleikar. Svo er hægt að hringja í síma 902-1010 og þá renna þúsund krónur til málefnisins,“ segir Ragnhildur.