Aðalmálið að trommarar eru að jafnaði gott fólk

Tveir af fremstu trommuleikurum Norðurlandanna, þeir Erik Smith frá Noregi og Søren Frost frá Danmörku halda trommuvinnubúðir eða Drum camp á Íslandi í apríl. Vinnubúðirnar standa yfir heila helgi þar sem Erik og Søren miðla reynslu sinni og þekkingu en vinnubúðirnar hafa slegið í gegn í Danmörku og Noregi.

„Ég og Søren höfum fjórum sinnum áður haldið Drum camp, tvisvar í Kaupmannahöfn og tvisvar í Noregi, einu sinni í Molde og einu sinni í Ósló,” segir norski trommuleikarinn Erik Smith.

Þátttakendur koma með sitt eigið trommusett og segir Erik að ákaflega skemmtileg stemming myndist í vinnubúðunum. „Drum camp er einstök upplifun fyrir trommuleikara á öllum aldri með ólíka getu. Hugmyndin er að búa til skemmtilega, krefjandi og hvetjandi tvo daga fyrir þátttakendur sem þeir munu aldrei gleyma,” segir Erik.

„Hér er frábært tækifæri til að læra heila helgi af tveimur af bestu bestu trommuleikurum Norðurlanda. Erik og Søren eru menn í fremstu röð og þetta því tækifæri sem enginn trommuleikari ætti að láta fram hjá sér fara,“ bætir trommuleikarinn Jóhann Hjörleifsson við en hann og trommuleikarinn, Halldór Lárusson hafa aðstoðað við skipulagningu.

Aðeins er pláss fyrir 20 þátttakendur að hámarki en engin sérstök inntökuskilyrði eru í trommuvinnubúðirnar. „Við tökum við einstaklingum á öllum aldri og óháð getu. Í síðustu vinnubúðum sem voru í Ósló voru þátttakendur á aldrinum 13 ára og upp í 72 ára og það læra allir af öllum,“ segir Erik léttur lundu.

Eins og fyrr segir eru þeir báðir með eftirsóttustu og fjölhæfustu trommuleikurum Skandinavíu og hafa þeir komið víða við. Søren er til dæmis trommuleikari Stórsveitar danska ríkisútvarpsins og hefur leikið með nöfnum á borð við Mike Stern, Randy Brecker, Dr. John, Richard Bona, John Scofield. Erik hefur leikið með nöfnum á borð við Bill Champlin, Donna Summer, Bob Mintzer og Michael Bolton, ásamt því að hafa verið í húshljómsveitum í hinum ýmsu sjónvarpsþáttum í Noregi.

Erik kom hingað til lands árið 2012 og hélt þá svokallaðan masterclass með Gulla Briem og fer hann fögrum orðum um íslenska trommuleikara. „Ég hef dáðst af Gulli alveg frá því á áttunda áratuginum og hans vinnu með Mezzoforte, hann er frábær trommuleikari. Ég kynntist líka Jóhanni Hjörleifssyni árið 2012 og við urðum góðir vinir. Hann er einnig frábær og fjölhæfur trommuleikari sem ég virði mjög. Aðalmálið er þó að trommuleikarar eru gott fólk að jafnaði,” útskýrir Erik fullur tilhlökkunar.

Trommuvinnubúðirnar fara fram dagana 22. og 23. apríl í sal FÍH og fer skráning fram á drumcampreykjavik@gmail.com. Nánar má lesa um viðburðinn hér og hér.