Aðgerðir stopp meðan kosið er um miðlunartillögu í Ísal-deilunni

Verði miðlunartillaga ríkissáttasemjara í kjaradeilu starfsmanna við ISAL felld hefjast verkfallsaðgerðir á nýjan leik. Þeim hefur verið frestað til 11. apríl þegar niðurstaða á að liggja fyrir. Ríkissáttasemjari lagði fram tillögu sína um helgina.

„Tillagan er í kynningu og stéttarfélögin fara yfir hana með sínu félagsfólki,“ segir Kolbeinn Gunnarsson, formaður verkalýðsfélagsins Hlífar, en það eru félagsmenn Hlífar við höfnina í Straumsvík sem verið hafa í verkfalli í á fjórðu viku. Á meðan hafa yfirmenn í álverinu gengið í þeirra störf. „Svo er náttúrlega bara fólksins að taka afstöðu til tillögunnar þegar atkvæðagreiðsla hefst,“ segir hann.

Gengið verður til atkvæða 30. mars, en um er að ræða rafræna kosningu sem lýkur 11. apríl.

Kolbeinn segist ekki vilja tjá sig um hvernig tillögunni hafi verið tekið.

„Maður er bundinn þeim trúnaði að kynna það sem lagt var fram af hálfu ríkissáttasemjara,“ segir Kolbeinn. Til dæmis sé ekki opnað fyrir umræðu um tillöguna á kynningarfundum sem Hlíf haldi. Í kosningunni taki þátt öll stéttarfélög sem að deilunni koma. „En það er tekið upp úr sameiginlegum potti.“

Þá kjósa ISAL og Samtök atvinnulífsins einnig um tillöguna. Verði hún samþykkt falla niður aðgerðir og málarekstur vegna þeirra fyrir dómstólum.

Fram hefur komið að ekki hafi verið deilt um kaup og kjör heldur heimildir álversins til að nýta sér þjónustu verktaka í auknum mæli. 

Greinin birtist fyrst í Fréttablaðinu 23. mars.