Hvenær er eiginlega opið?

Páskahátíðin hefst á morgun og eru landsmenn margir hverjir í fríi og hugsa sér sjálfsagt gott til glóðarinnar þegar kemur að hvers kyns skemmtun á komandi dögum.

Á hverju ári skapast umræða á samfélagsmiðlum um það hvenær skemmtistaðir landsins eru opnir. Þó töluvert auðvelt sé að nálgast upplýsingarnar á vef lögreglunnar þá skellti Fréttablaðið í einfalt yfirlit um hvenær heimilt er að hafa opið yfir hátíðarnar en skemmtanir eru bannaðar á ákveðnum tíma um páska.

Undir skemmtanir falla dansleikir eða einkasamkvæmi sem efnt er til á opinberum veitingastöðum eða öðrum stöðum sem almenningur hefur aðgang að. Um opinberar sýningar og skemmtanir gildir hið sama en þó skal því haldið til haga að kvikmynda- og leiksýningar, tónleikar og listsýningar eru undanþegnar banni um helgidagafrið á föstudaginn langa og páskadag en viðburðirnir mega þó ekki hefjast fyrr en klukkan 15.00.

Miðvikudagur 23. mars

Flestir eru í fríi daginn eftir og er því kvöldið í kvöld svokallað djammkvöld en opið er til 03.00 eða 04.30 samkvæmt leyfi þeirra staða sem um er að ræða.

Fimmtudagur 24. mars

Á morgun er skírdagur sem er lögbundinn frídagur en skírdagur var upphafsdagur hinnar fornu páskahátíðar gyðinga og minnast þeir sem eru kristinnar trúar þess að Kristur þvoði fætur lærisveinanna fyrir síðustu kvöldmáltíðina.

Föstudagurinn 25. mars

Föstudagurinn langi er einnig lögbundinn frídagur líkt og skírdagur. Lokað er til miðnættis en staðir mega opna þá og líkt og á skírdag er opið til 03.00 eða 04.30 samkvæmt leyfi.

Laugardagurinn 26. mars

Næstkomandi laugardagur er bara venjulegur laugardagur og ekki um lögbundinn frídag að ræða. Laugardagar eru þó fremur ánægjulegir dagar þar sem þeir sem vinna ekki vaktavinnu eru í flestum tilfellum í fríi á laugardögum og sunnudögum. Opið er til klukkan 03.00.

Sunnudagur 27. mars

Hinn eini sanni páskadagur. Hér er um að ræða þriðja lögbundna frídag páskahátíðarinnar og má fastlega gera ráð fyrir að flestir landsmenn verði vant við látnir við að rífa í sig páskaegg í ólíkum útfærslum. Lokað er á flestum stöðum en opna má á miðnætti og vera opið til 03.00 eða 04.30 samkvæmt leyfi.

Mánudagur 28. mars

Annar í páskum er svo fjórði og síðasti lögbundni frídagur hátíðarinnar og má vera opið til klukkan 01.00 líkt og á venjulegum vikudögum.

Augljóst mál að það verður alltaf einhver að djamma

„Ég man alltaf eftir því að fyrir rúmum tíu árum þá var páskasunnudagur stærsti dagurinn og einhvern veginn núna er hann sá minnsti að mínu mati. Núna er það aðallega dagurinn fyrir skírdag því þá er frí daginn eftir. Á skírdag er lokað klukkan tólf og það var allt dautt en núna er það einhvern veginn komið inn að djamma til tólf,“ segir Óli Hjörtur Ólafsson, listrænn stjórnandi Tivoli bars í Hafnarstræti.

Hann segir föstudaginn langa einnig hafa breyst en hér áður fyrr mátti ekki hafa opið á þeim degi en núna má opna á miðnætti. Einnig hafi páskasunnudagur minnkað og hans upplifun sé sú að fólk jafni djammið meira út yfir fleiri daga og hinir dagarnir séu að koma sterkir inn. Þó séu alltaf einhverjir sem láti sjá sig á barnum. „Það verður alltaf eitthvert fólk að djamma, það er bara augljóst mál.“

Óli Hjörtur segir bareigendur einnig hafa varann á og gæta þess að birgja sig vel upp. „Það eru alltaf páskarnir og jólin sem fólk passar að hafa vel „stokkað“, ég hef aldrei lent í því því að það hafi allt klárast. Það hefur svona næstum því gerst en við höfum alltaf getað reddað okkur.“