Rolling Stones bauð Kúbverjum í veislu í höfuðborginni

Öldungarnir í bresku hljómsveitinni Rolling Stones héldu sögulega tónleika í Havana, höfuðborg Kúbu, í gær fyrir hátt í hálfa milljón manns. Tónleikarnir eru sögulegir fyrir þær sakir að stærstan hluta síðustu aldar og í upphafi þessarar var hljómsveitin bönnuð í landinu. Frítt var á tónleikana en þeir fóru fram á föstudaginn langa þrátt fyrir að páfinn hefði beðið um að þeim yrði frestað.

Tæp fimmtán ár eru frá því að banninu var aflétt. Það var að vísu ekki bundið við hljómsveitina heldur vestræna menningu í heild sinni. Kúba var kommúnískt ríki en á síðustu árum hafa stjórnvöld slakað á afstöðu sinni. Sérstaka breytingu má merkja á undanförnum átján mánuðum.

Fjölmargir aðdáendur, sem mættu til að berja sveitina augum, höfðu þurft að fara leynt með aðdáun sína á sveitinni. „Þetta var forboðið. Við gátum til að mynda ekki hlustað á Bítlana. Nú megum við hlusta á það sem við viljum,“ sagði tónleikagestur í samtali við BBC. Annar hafði á orði að nú gæti hann dáið sáttur. Að sjá Rolling Stones væri eitthvað sem hann hefði alltaf dreymt um.

Meðlimir sveitarinnar eru komnir á áttræðisaldur að unglambinu Ronnie Wood undanskyldu. Hann er aðeins 68 ára. Mick Jagger og Keith Richards eru jafnaldrar, 72 ára, en aldursforsetinn Charlie Watts sér um að berja húðirnar. Hann er 74 ára gamall. Þeir buðu upp á tveggja klukkustunda tónleika sem taldi átján lög. Þar á meðal alla helstu smelli sveitarinnar á borð við Sympathy for the Devil og Gimme Shelter.

Myndir af tónleikunum frá Getty-myndaveitunni má sjá hér fyrir neðan auk myndbands frá La Habana þar sem tónleikarnir voru haldnir.