Bein útsending: Kvöldfréttir Stöðvar 2

Í kvöld verður rætt við íbúa í Iðufelli í Breiðholti í kvöldfréttum Stöðvar 2. Þeir eru óttaslegnir eftir að brennuvargar gengu á milli húsa í gær og kveiktu í. Allt tiltækt slökkvilið var kallað út í gær vegna tveggja bruna í Iðufelli en kveikt var í andyri tveggja húsa. Lögregla fer með rannsókn málsins og er brennuvarganna enn leitað.

Þá heldur ítarlega umfjöllun kvöldfrétta Stöðvar 2 um hryðjuverkin í Brussel áfram og farið verður yfir nýjustu vendingar í rannsókn hryðjuverkanna. Einnig verður rætt við vígslubiskupinn í Skálholti sem gagnrýnir úthlutun úr framkvæmdasjóði ferðamanna og er ósáttur við að staðurinn hafi ekki fengið pening.

Þetta og margt fleira í kvöldfréttum Stöðvar 2, klukkan 18:30 á samtengdum rásum Stöðvar 2 og Bylgjunnar. Sem fyrr verður fréttatíminn í beinni útsendingu á fréttavefnum Vísi og má horfa á hann í spilaranum hér fyrir ofan.