Milljónamiðinn á Kópaskeri: „Þetta er gott fyrir svona staði“

Miði sem keyptur var í nýlenduvöruversluninni Skerjakollu á Kópaskeri tryggði fyrsta vinning í lottóinu í gærkvöldi. Miðahafans bíða 14,7 milljónir króna en hann hefur ekki gefið sig fram samkvæmt upplýsingum frá Íslenskri getspá en fastlega má búast við því að svo verði í vikunni.

Inga Sigurðardóttir rekur Skerjakollu ásamt eiginmanni sínum Guðmundi Baldurssyni. Hjónin tóku við rekstri verslunarinnar fyrir um tveimur árum en þetta er í fyrsta skiptið sem miði keyptur í Skerjakollu tryggir fyrsta vinning í lottóinu frá því þau tóku við rekstrinum.

Samkvæmt tölum Hagstofunnar búa 124 á Kópaskeri en Inga segist ekki vita til þess að það hafi spurst út í bænum hver miðaeigandinn er.

„Ég hef ekki hitt mikið af fólki því búðin er lokuð á laugardögum og sunnudögum og ég og maðurinn því bara búin að vera í rólegheitum hér heima. Ég man hins vegar að ég seldi töluvert af lottómiðum á föstudeginum,“ segir Inga.

Skerjakolla er ekki aðeins nýlenduvöruverslun heldur einnig kaffihús og sportbar og segir Inga íbúa Kópaskers koma saman þar og spjalla um daginn og veginn en hún segir þessi tíðindi góð fyrir Kópasker.

„Þetta er gott fyrir svona staði að vakin sé athygli á þeim, að þeir séu til og það gerist eitthvað þar,“ segir Inga. 

Eins og fyrr segir fór fyrsti vinningur út í gær en tveir voru einnig með fjórar tölur réttar í Jókernum og hlýtur hvor þeirra 100 þúsund krónur í vinning. Miðarnir tveir voru keyptir í Happahúsinu í Kringlunni og í áskrift.