Börsungar sleppa við 16-liða úrslitin | Sjáðu mörkin hjá Guðjóni Val

Guðjón Valur Sigurðsson og félagar í Barcelona eru komnir áfram í 8-liða úrslit Meistaradeildar Evrópu í handbolta eftir öruggan sex marka sigur, 26-20, Rhein-Neckar Löwen í kvöld.

Með sigrinum gulltryggðu Börsungar sér sigur í B-riðli en Evrópumeistararnir fengu 23 stig í 14 leikjum í riðlakeppninni.

Verðlaunin fyrir toppsætið í riðlinum er farseðill beint í 8-liða úrslitin. Löwen fer hins vegar í 16-liða úrslitin sem verða leikin síðar í þessum mánuði.

Guðjón Valur skoraði fimm mörk fyrir Barcelona en Wael Jallouz og Kiril Lazarov voru markahæstir í liði Evrópumeistaranna með sex mörk hvor. Besti maður liðsins var hins vegar Gonzalo Perez de Vargas sem varði hátt í 30 skot í markinu.

Alexander Petersson skoraði tvö mörk fyrir Löwen og Stefán Rafn Sigurmannsson eitt.