Einkunnaverðbólga í Verzló 1,4 % á ári

„Einkunnaverðbólga“ upp á 1,4 prósent á ári hefur átt sér stað meðal grunnskólanema sem sækja um pláss í Verzlunarskóla Íslands síðustu ár. Þetta er mat tveggja nemenda við tækni- og verkfræðideild Háskólans í Reykjavík sem gert hafa úttekt á þróun einkunna úr grunnskóla og tengsl þeirra við námsárangur í framhaldsskóla.

Umræða um það hversu gríðarmikið einkunnir grunnskólanema hafa hækkað frá afnámi samræmdra prófa í grunnskóla hefur nokkrum sinnum sprottið upp að undanförnu og til að mynda var greint frá því síðasta sumar að Verzló, vinsælasti menntaskólinn í fyrra, þurfti að hafna rúmlega sextíu nemendum sem voru með 9,0 eða yfir í meðaleinkunn.

„Við pældum mikið í því hvers vegna einkunnirnar hefðu hækkað svona mikið,“ segir Halla Berglind Jónsdóttir, sem vann úttektina ásamt Bjarka Benediktssyni. „Við töluðum því við Inga skólastjóra og fengum þessi gögn, sem ekki er hægt að rekja til nemenda.“

Halla og Bjarki skoðuðu einkunnir þeirra nemenda sem innrituðust í Verzlunarskólann frá árinu 2004 en þrjú ár vantar þó inn í gögnin vegna tæknilega örðugleika. Meðaleinkunnir nemenda í íslensku og stærðfræði voru skoðaðar, annars vegar úr tíunda bekk grunnskóla og hins vegar á fyrstu önn í Verzló.

Ekki um „gullna kynslóð“ námsmanna að ræða

Augljóst er að grunnskólaeinkunnir nemendanna hafa farið hækkandi frá árinu 2008, þegar samræmd próf voru aflögð, og nýtt einkunnamet raunar sett á hverju ári. Þau Halla og Bjarki skoðuðu þó möguleikana á því að þessi hækkun einkunna stafaði af því að fleiri eða einfaldlega betri nemendur væru að sækja um.

„En það kom í ljós að árið 2008 var hágildi,“ segir Halla. „Þá voru 556 umsóknir en síðan þá hafa bara verið rúmlega 400 á ári. Hæsta meðaleinkunnin inn í Verzló hefði kannski átt að vera árið 2008, en það var ekki raunin.“

Þá benda einkunnir nemendanna á fyrstu önn í framhaldsskóla ekki til þess að um „gullna kynslóð“ námsmanna sé að ræða. Meðaleinkunn í stærðfræðiáfanganum STÆ103 hefur lækkað frá afnámi samræmdu prófanna en meðaleinkunn í íslenskuáfanganum ÍSL103 (áður ÍSL102) staðið í stað.

„Vegna þess að meðaleinkuninn er orðin svo há, og allir komnir með sömu einkunn, þá er engin leið að sjá hver er í alvöru með 9,5 og hver ætti að vera með svona átta,“ segir Halla. „Þetta gæti skýrt lækkandi meðaleinkunn í Verzló, því þetta er ekki lengur sanngjarnt.“

Miðað við svokallaðan CAGR-verðbólgustuðul, hefur „meðalverðbólga“ grunnskólaeinkunna nýnema við Verzló numið 1,35 prósenti á ári í stærðfræði og 1,48 prósenti á ári í íslensku frá árinu 2011. Í úttekt þeirra Höllu og Bjarka er bent á hversu mikil fylgni virðist vera í fögunum tveimur og að það gefi til kynna að skekkja sé í kerfinu þar sem einkunnir í báðum námsgreinum hækka jafn mikið hlutfallslega.

„Okkar tilgáta, sem við getum ekki sannað vegna þess að við erum ekki með nein töluleg gögn um það, er sú að án samræmdra prófa sjá skólar um námsmatið,“ segir Halla. „Og ef þú ert kennari og gerir þitt próf of erfitt miðað við aðra skóla, fá þínir nemendur lægra en hinir og þú ert í raun ábyrgur fyrir því að þau komast ekki inn í skólana.“

Til stendur að koma samræmdum prófum aftur á í grunnskóla næsta vetur, en þau verða færð til vors í níunda bekk og gerð rafræn. Bolli Héðinsson, kennari þeirra Höllu og Bjarka, hefur komið verkefni þeirra áfram til Menntamálastofnunar sem hyggst færa sér niðurstöðurnar í nyt.