Cameron mættur til Brussel til að ræða breytta aðildarskilmála Breta

David Cameron, forsætisráðherra Bretlands, er mættur til Brussel þar sem hann vonast til að tryggja stuðning við breytta aðildarskilmála Bretlands.

Tveggja daga leiðtogafundur sambandsins hefst á fimmtudag, en þangað til mun Cameron eiga fundi með Jean-Claude Juncker, forseta framkvæmdastjórnar ESB, og háttsettum Evrópuþingmönnum.

Donald Tusk, forseti leiðtogaráðsins, sagði í gær að samningaviðræðurnar við bresk stjórnvöld væru á tvísýnum tímapunkti og varaði við að raunveruleg hætta væri á að Bretar myndu yfirgefa sambandið.

Í frétt BBC kemur fram að margir telji samningsdrög ESB og Breta ganga of langt, þeirra á meðal Frakkar, og mætti Cameron til Parísar í gærkvöld til að ræða við franska ráðamenn.

Breski forsætisráðherrann hefur heitið því að haldin verði þjóðaratkvæðagreiðsla um ESB-aðild Bretlands fyrir árslok 2017.