Fjórtán ára drengur fannst eftir umfangsmikla leit

Unglingspiltur fannst heill á húfi á höfuðborgarsvæðinu um klukkan hálf fjögur í nótt, eftir að umfangsmikil leit hófst að honum upp úr miðnætti.

Pilturinn, sem á við veikindi að stríða, yfirgaf sjúkrahús, sem hann dvelur á,  um kvöldmatarleytið og þegar hann hafði ekki skilað sér um miðnætti, voru björgunarsveitir kallaðar út og voru sporhundar einnig notaðir við leitina.

Leitarmenn voru orðnir hátt í eitt hundrað þegar pilturinn fannst heill á húfi og var hann aftur lagður inn á sjúkrahúsið.