Nauðsynlegt að styðja betur við fólk á leigumarkaði

Eygló Harðardóttir félagsmálaráðherra segir að skýrsla UNICEF um börn sem líða efnislegan skort sýni fram á nauðsyn þess að styðja betur við fólk á leigumarkaði.

Mesti skortur meðal barna á Íslandi mælist á sviði húsnæðis samkvæmt skýrslu UNICEF eða um 13,4 prósent. Meðal annars var spurt um þröngbýli, aðgengi að salerni og hvort næg dagsbirta komi inn um gluggana á húsnæðinu.

Eygló Harðardóttir félagsmálaráðherra segir að skýrslan sýni fram á nauðsyn þess að bregðast sem fyrst við þessum vanda.

„Mér finnst líka mjög áhugavert og mjög mikilvægt og styður við þá vinnu sem við höfum verið að vinna í ráðuneytinu að helsta ástæða skorts hjá börnum á Íslandi eru húsnæðismál foreldra þeirra. Það er fyllilega í samræmi við þær upplýsingar sem við höfðum og er ástæða þess að við leggjum jafn mikla áherslu á húsnæðismálin í velferðarráðuneytinu. Síðan er annar stærsti þátturinn sem við höfum séð líka í öðrum könnunum snýr að tómstundum og frístundum barnanna. En jákvæða niðurstaðan er að það er greinilegt að foreldrar eru að forgangsraða þannig að það eru færri börn sem líða skort hvað varðar mat þannig að forgangsröðunin hefur greinilega farið þangað,“ segir Eygló.

Ráðherra hefur þegar lagt fram fjögur frumvörp á Alþingi sem snúa að húsnæðismarkaðinum en þeim er meðal annars ætlað að styrkja stöðu leigjenda.

„Þessi skýrsla endurspeglar kreppuárin. Það var farið hér í mikinn niðurskurð á síðasta kjörtímabili. Það tekur tíma að snúa því við. Það er greinilegt að staða barna er mjög tengd atvinnu- og húsnæðisstöðu foreldra. Atvinnuleysi hefur minnkað mikið og þar af leiðandi er staðan að batna. En við vitum það að staðan er ennþá erfið og ekki hvað síst á leigumarkaðinum," segir Eygló.