Aðalinngangi kvennadeildar Landspítala lokað á mánudag

Aðalinngangi kvennadeildahúss Landspítalans við Hringbraut verður lokað í þrjár vikur frá mánudeginum 25. janúar. Er það gert vegna jarðvinnu í aðdraganda byggingar nýs sjúkrahótels.

Aðalinngangur Barnaspítala Hringsins verður aðalinngangur kvennadeilda á lokunartímanum.

Í tilkynningu frá Landspítalanum segir að leiðin frá anddyri barnaspítalans að lyftu á jarðhæð kvennadeildahúss verði merkt með skiltum og örvum.

„Innkeyrsla að Landspítala Hringbraut frá Barónsstíg er lokuð. Ný innkeyrsla verður opnuð á árinu 2016 lítið eitt ofar við Barónsstíg en sú sem áður var.

Í stað gjaldskyldra bílastæða sem voru við K-byggingu og kvennadeildahús hefur bílastæðum verið fjölgað neðan við aðalbygginguna, nálægt aðalinngangi barnaspítalans.

Öll bílastæði neðan aðalinngangs spítalans (Kringlunnar) að gangstígnum upp að miðri aðalbyggingunni eru gjaldskyld,“ segir í tilkynningunni.