Illskiljanleg breyting

Samtök sveitarfélaga á Norðurlandi vestra (SSNV) mótmæla þeim hugmyndum um breytingu á Jöfnunarsjóði sveitarfélaga að tekjum sjóðsins vegna hlutdeildar í skatti á fjármálafyrirtæki verði ráðstafað í samræmi við álagt útsvar ársins 2014.

Meðalútsvar sveitarfélaga á starfsvæði samtakanna er sagt hafa verið lægra en meðalútsvar á landinu. Því muni sveitarfélög NV-lands bera minna úr býtum eftir breytinguna.

„Það er illskiljanlegt hvernig það getur talist sanngjarnt eða samræmst lögum um tekjustofna sveitarfélaga, þar sem skýrt kemur fram að hlutverk Jöfnunarsjóðs er að jafna mismunandi útgjaldaþörf og skatttekjur sveitarfélaga með framlögum úr sjóðnum, að sérstöku framlagi Jöfnunarsjóðs skuli eiga að ráðstafa þannig að þau sveitarfélög sem þegar hafa mestar tekjur fái bróðurpartinn af tekjum Jöfnunarsjóðs af sérstökum skatti á fjármálafyrirtæki,“ segir í ályktuninni.