Íslendingur grunaður um að beita barn ofbeldi metinn sakhæfur

23 ára Íslendingur í Noregi, sem grunaður er um að hafa beitt tveggja ára íslenskt barn alvarlegu líkamlegu ofbeldi, hefur verið metinn sakhæfur. Hann er enn í haldi lögreglu.

Maðurinn var handtekinn þann 23. október síðastliðinn og hefur verið í gæsluvarðhaldi síðan. Hann er ekki faðir barnsins sem honum er gert að sök að hafa ráðist á, heldur átti hann í sambandi við móður barnsins sem einnig er íslensk. Árásin á að hafa átt sér stað í bænum Lye, skammt frá Stafangri.

Hann hefur nú gengist undir geðmat og metinn sakhæfur. Samkvæmt Unni Byberg Malmin, saksóknara í málinu, hefur ákæra þó ekki enn verið gefin út á hendur honum. Lögregla í Stafangri bíður enn greinargerð sérfræðinga sem skoðað hafa barnið að undanförnu.

Barnið var útskrifað af sjúkrahúsi í nóvember og er sagt á góðum batavegi.

Gæsluvarðhald yfir manninum rennur út á mánudaginn en Unni segir að lögregla hafi farið fram á framlengingu. Maðurinn hefur ekki hlotið dóm í Noregi en hlaut átján mánaða fangelsisdóm fyrir líkamsárás hér á landi árið 2012.