Valencia vann án Jóns Arnórs

Valencia vann sinn fimmtánda leik í röð í spænsku úrvalsdeildinni í körfubolta í dag, þegar liðið vann átta stiga sigur á Morabanc Andorra, 86-78.

Valencia byrjaði vel og vann fyrsta leikhlutann 23-20, en staðan var þó jöfn í hálfleik 44-44. Eftir þriðja leikhlutann var staðan enn jöfn, 62-62.

Í fjórða og síðasta leikhlutanum stigu Valencia-menn á bensíngjöfina og unnu að lokum átta stiga sigur, 86-78.

Þetta var fimmtándi sigur Valencia í röð í deildinni, en þeir eru búnir að vinna alla 26 leki á tímabilinu; í spænsku úrvalsdeildinni og Evrópukeppninni.

Jón Arnór Stefánsson spilaði ekki með Valencia vegna meiðsla í baki, en þetta er þriðji leikurinn í röð sem Jón Arnór missir af.

Bojan Dubljevic skoraði 17 stig fyrir Valencia auk þess að taka sex fráköst. Næstur kom Antoine Diot, en hann skoraði sextán stig.