Nauðsynlega þurfi að bæta eftirlit með aðilum sem stundi útleigu í atvinnuskyni

Talsvert vantar upp á að leigumarkaður á Íslandi sé í eðlilegu jafnvægi. Framboð fjölbreyttra leiguíbúða er ekki nægjanlegt og verulegur skortur er á húsnæði til langtímaleigu. Þetta er meðal þess sem fram kemur í nýrri skýrslu Leigjendaaðstoðarinnar.

Jafnframt segir að nauðsynlega þurfi að bæta eftirlit með aðilum sem stundi útleigu í atvinnuskyni og í raun að endurskoða ýmsa þætti þess regluverks sem snúi að leigumarkaði. Víst sé að stjórnvöld geri sér grein fyrir vandanum á leigumarkaði en að ekki sé annað séð en að vilji sé til þess að koma á fót öruggum og heilbrigðum leigumarkaði. Biðin eftir aðgerðum sé þó orðin nokkur.

„Það er mat Leigjendaaðstoðarinnar að þau lagafrumvörp sem liggja nú fyrir Alþingi og varða leigumarkaðinn séu að mörgu leyti til bóta, en jafnframt að betur megi ef duga skal, og að óhjákvæmilegt sé að veita nokkru fjármagni í þennan málaflokk, t.a.m. þegar kemur að eftirliti,“ segir í skýrslunni.