Mikill meirihluti notað farsíma undir stýri síðustu tólf mánuði

Nýleg könnun MMR sýnir að fjórir af hverjum fimm Íslendingum hafa notað farsíma undir stýri síðastliðna tólf mánuði.

Samkvæmt könnun MMR hafa 79 prósent Íslendinga notað síma undir stýri síðastliðna tólf mánuði. Könnunin sýndi þó að fjöldi þeirra sem tala í símann án handfrjáls búnaðar hefur minnkað stöðugt síðan árið 2010 og farið úr 71 prósent árið 2010 í 64 prósent árið 2014 og mældist nú árið 2016 56 prósent.

Aftur á móti hefur fjöldi þeirra sem tala í símann undir stýri með handfrjálsum búnaði hefur stóraukist úr 24 prósent árið 2014 í 39 prósent árið 2016.

23 prósent svarenda sögðust hafa notað farsíma undir stýri til þess að skrifa eða lesa tölvupóst, sms eða önnur skilaboð á síðastliðnum tólf mánuðum.

Þar að auki sögðust tólf prósent svarenda sögðust hafa notað farsíma undir stýri til þess að taka mynd, tólf prósent til þess að fara á internetið og tvö prósent til þess að spila tölvuleik.

Eldri aldurshópar voru mun ólíklegri til að nota síma undir stýri. Þannig sögðust 57 prósent þeirra sem voru 68 ára eða eldri ekki hafa notað farsíma undir stýri síðastliðna 12 mánuði, samanborið við 25 prósent þeirra sem voru 50-67 ára og tólf prósent þeirra sem voru 30-49 ára. Tekjulægri hópar voru einnig ólíklegri til að nota farsíma undir stýri.

Athygli vekur að fólk sem búsett var á höfuðborgarsvæðinu var mun líklegra til að tala í farsíma undir stýri með handfrjálsum búnaði, eða 46 prósent, samanborið við 28 prósent þeirra sem höfðu búsetu á landsbyggðinni. 29 prósent þeirra sem voru 18-29 ára höfðu notað farsíma undir stýri til að taka mynd. Til samanburðar höfðu tólf prósent þeirra sem voru á aldrinum 30-49 ára notað síma undir stýri til að taka mynd en innan við eina prósent þeirra sem voru 50 ára eða eldri.