Hæstiréttur ómerkti dóm yfir hrossasala

Hæstiréttur ómerkti í dag dóm yfir hrossasala sem dæmdur var í héraði fyrir að gefa ekki upp 52 milljónir króna til skatts á árunum 2005 til 2010.

Maðurinn var dæmdur af Héraðsdómi Reykjaness í tíu mánaða skilorðsbundið fangelsi til tveggja ára fyrir að hafa í sjálfstæðri atvinnustarfsemi sinni skilað efnislega röngum skattframtölum og virðisaukaskattsskýrslum vegna áranna 2005 til 2009 og ekki staðið skil á gjöldum. Þá var honum gert að greiða 104 milljónir króna til ríkissjóðs innan mánaðar, eða sæta tólf mánaða fangelsi ella.

Í dómi Hæstaréttar kom fram að hvað sem liði skýringum sakflytjenda hefði engin niðurstaða fengist á því til hvaða gagna héraðsdómur hefði litið og lagt til grundvallar þegar ætluð heildarvanskil voru metin. Því hafi verið talið að verulegir annmarkar hefðu verið á samningu hins áfrýjaða dóms og hafi hann því verið ómerktur. Málinu hefur því verið vísað heim í hérað til löglegrar meðferðar að nýju.

Maðurinn bar því við fyrir dómi að á fyrri hluta tímabilsins sem til skoðunar er – á árunum 2005 og 2006 – hafi honum ekki borið að gefa tekjur sínar af sölunni upp til skatts þar sem viðskipti með hesta hafi einungis verið áhugamál hjá honum. Viðskiptin hafi hins vegar undið upp á sig og hann stofnað félag um hrossasöluna.

Í kjölfar hrunsins sagðist hann hafa lent í fjárhagsvandræðum og reynt að skapa sér tekjur með viðskiptum með keppnishross. Vegna fjárhagsvandræða hans hafi rekstur hrossasölunnar aldrei farið inn í félagið heldur verið á kennitölu hans sjálfs og eiginkonu hans. Hann gekkst við því að hafa ekki talið fram tekjur sínar vegna viðskipta með hross á skattframtölum eða virðisaukaskattskýrslum sem hann skilaði inn. Þá gekkst hann einnig við því að hafa ekki greitt virðisaukaskatt, tekjuskatt eða útsvar vegna viðskipta sinna með hross. 

Hann vefengdi heldur ekki þær tölulegu upplýsingar sem komu fram í ákærunni, en hélt hins vegar fram að upplýsingar um kostnað við hrossasöluna hafi vantað og hafi numið þegar mest var 100 þúsund krónum á mánuði.