Sérsveit kölluð til við að ná ölvuðum ferðamanni af svölum Þjóðleikhússins

Töluverður erill var hjá lögreglunni á höfuðborgarsvæðinu í nótt. Að mestu var um ölvun og ólæti því tengt að ræða en þá var einnig tilkynnt um líkamsárás í Hafnarfirði.

Á sjötta tímanum veittu lögreglumenn í eftirliti í miðborginni karlmanni athygli en sá hafði klifrað upp á svalir Þjóðleikhússins. Reyndist þetta vera erlendur ferðamaður. Ferðamaðurinn var greinilega nokkuð ölvaður og ljóst að hann myndi ekki komast niður af sjálfsdáðum og var því óskað eftir aðstoð frá Slökkviliði höfuðborgarsvæðisins með kranabifreið. Þá naut lögregla einnig aðstoðar lögreglumanna frá sérsveit ríkislögreglustjóra sem voru sérútbúnir til klifurs. Karlmaðurinn var svo handtekinn í kjölfarið enda gat hann ekki gefið útskýringar á þessu háttalagi sínu. Auk þess sem hann gat ekki gefið upplýsingar um hvar hann væri til húsa.

Um klukkan hálf sex í morgun var karlmaður handtekinn eftir að hafa ítrekað truflað lögreglu við störf ímiðborginni auk þess sem hann hafði neitað að gefa upp persónuupplýsingar. Var hann í talsvert annarlegu ástandi sökum ölvunar. Hafði honum verið gefin ítrekuð fyrirmæli um að láta af þessu háttalagi sínu en hann varð ekki við því. Var hann því færður á lögreglustöð og vistaður í fangaklefa þangað til hægt væri að ræða við hann.

Á sjöunda tímanum óskaði karlmaður sem staddur var í miðbæ Hafnarfjarðar eftir aðstoð þar sem hann hefði orðið fyrir líkamsárás inni á heimili sínu skammt frá miðbænum. Hafði komið til átaka á milli karlmannsins og meðleigjenda hans. Karlmaðurinn var með áverka á höfði og í andliti. Var hann fluttur á slysadeild til skoðunar og aðhlynningar.