Kjarval, Egill Helga, Ringó, Van Gough og allir þeir

Jón Óskar er einhver gæjalegasti myndlistarmaður Íslands og þó víðar væri leitað. Hann opnaði einkasýningu í Tveimur Hröfnum síðdegis í dag. Listhúsið er staðsett í hjarta Þingholtanna. Troðfullt hús var og mikil stemmning. Tíðindamaður Vísis var á staðnum, að sjálfsögðu enda voru þarna allir þeir sem eru eitthvað í listageiranum. Og fleiri til. 

Sýningin heitir Beaucoups of Blues og listamaðurinn útskýrði fyrir blaðamanni Vísis að hann væri undir miklum áhrifum frá ýmsum listamönnum úr ýmsum áttum og verkin endurspegla það; blóm frá Kjarval dúkka upp í mynd af hundi hans, Jón Óskar vottar Van Gough virðingu sína í einu verkanna og Egill Helgason kemur óvænt við sögu í einu verkinu sem heitir The Waste Land í þýðingu Egils Helgasonar 15 ára. 

„Ég gleymi þessu aldrei, en Egill sagði mér frá þessu fyrir um tuttugu árum. Að hann hafi þýtt þetta ljóð 15 ára gamall. Þetta er eitthvað svo fallegt. Þegar ég var 15 ára þá var ég í borðtennis eða gera eitthvað slíkt.“

Beaucoups of blues er svo lag sem Ringó hinn eini sanni söng við texta Buzz Rabin, sem er í miklu eftirlæti hjá Jóni Óskari. Og ekki ómerkari listakona en ljóðskáldið Linda Vilhjálmsdóttir samdi ljóð til sérstaklega til Jóns Óskars, sem finna má í sýningarskrá:

Íslandsblá mynd

af mér í fjörunni heima

að horfa á Jón Óskar mála

portrett af Trenet að syngja

La Mer

Nánar verður fjallað um sýninguna í Fréttablaðinu og þá Vísi, en hér eru fáeinar ljósmyndir frá sýningunni.