Björt segir atburðarrás í kringum forsetakosningarnar svolítið sorglega

Björt Ólafsdóttir, þingmaður Bjartrar framtíðar, segir atburðarásina í kringum forsetakosningarnar hafa verið forvitnilega en um leið svolítið sorglega. Þetta sagði hún á Sprengisandi í morgun en hún var gestur Páls Magnússonar ásamt Helga Hjörvari, þingmanni Samfylkingarinnar, og Guðlaugi Þór Þórðarsyni, þingmanni Sjálfstæðisflokks. Hér að neðan má heyra viðtalið við þingmennina.

Björt telur ákveðna aðila hafa gert sig svo veigamikla í umræðunni að þeir telji sig „þurfa að ákveða“ hverjir eru hæfir til að bjóða sig fram í forseta. Þarna vísar hún til orða Ólafs Ragnars Grímssonar, sitjandi forseta, þegar hann ákvað að hætta við að hætta við að bjóða sig fram í sjötta sinn til embættis forseta Íslands. Hún telur mikilvægt að leyfa þjóðinni að ráða sjálfri hverja hún treystir til forsetaembættisins.

„Fólkið á að ráða,“ sagði Björt. Það eigi allir að geta boðið sig fram og svo sé kosið með lýðræðislegum hætti.

Guðlaugur Þór segir það hafa komið verulega á óvart að Davíð Oddsson, fyrrum forsætisráðherra, hafi boðið sig fram til forseta. „Hann er svo sannarlega öflugur frambjóðandi og yrði góður forseti. Það er ekkert leyndarmál að ég mun kjósa hann.“

Björt hyggst kjósa Guðna Th Jóhannsson en hún er yfirlýstur stuðningsmaður hans. Helgi Hjörvar sagðist ekki vilja blanda sér í forsetaslaginn og gaf ekki upp hvern hann hyggst kjósa í júní. 

Panama-skjölin krauma enn í fólki

Þingmennirnir þrír ræddu Panama-skjölin svonefndu og afleiðingar þeirra. Þau eru öll sammála um að það þurfi að ræða málin ítarlega og komast að því hvernig þjóðin og stjórnvöld vilja taka á þessum málum.

„Ég tel að við þurfum að ræða þetta á dýptina og eins og þetta er,“ sagði Guðlaugur Þór. Hann telur að Mossack Fonseca, sú lögfræðiskrifstofa sem Panama-skjölin taka til, hafi aðeins haft um fimm prósent þeirra aflandsviðskipta sem Íslendingar stunduðu hér á árunum fyrir hrun. „Manni finnst þetta í besta falli ósiður. Sjaldnast er þetta á einhverjum eðlilegum forsendum en svo getur þó stundum verið,“ sagði Guðlaugur um aflandsfélög.

Björt sagði að með skjölunum hefði verið ljóstrað upp um þá staðreynd að á Íslandi búi tvær þjóðir – annars vegar þeir sem fela peningana sína í aflandsfélögum vel og vandlega og hins vegar þeir sem geyma sínar krónur og aura í íslensku bönkunum og greiði samviskusamlega af þeim skatta og gjöld. Hún segir skjölin enn krauma í landanum og að von sé á fleiri uppljóstrunum.